နှောင်ဖွဲ့ခြင်းကင်း တန်ခိုးရှင်

ဘာသာပြန် ... Oo Zaw

အပိုင်း (၈၅) အခြေခံခိုးယူခြင်း (၅)

ထန်းလီ၏မျက်လုံးက ရုတ်တရက် ပွင့်လာသည်။ သူ၏မျက်လုံးသည် ယခင်ကဲ့သို့ တောက်ပမှု မရှိတော့ဘဲ နီရဲနေ၏။ သူ၏နှုတ်ခမ်းများက တုန်ယင်နေပြီး မေးရိုးများကလည်း တင်းနေအောင် စေ့ထား၏။

ဝမ်လင်းက ညာလက်ဖြင့် ရှုပ်ထွေးသောသင်္ကေတ တစ်ခုကို လေထဲတွင် ဆွဲလိုက်သည်။ ထို့နောက် လက်ချောင်းတစ်ချောင်းကို ကိုက်လိုက်ပြီး သွေးစက်တစ်စက်ကို ထန်းလီ၏ဦးခေါင်းပေါ်သို့ ဆတ်ခနဲ တောက်ထုတ်လိုက်၏။

ထန်းလီထံမှ ညည်းသံတစ်ချက် ထွက်ပေါ်လာပြီး သူ့ခန္ဓာကိုယ်က ဆန့်တငင်ငင် လှုပ်ရှားလာသည်။ သူ၏အရေပြားအောက်မှ အရာအားလုံးက လှုပ်ရှားလာပြီး ရင်ဘတ်ဆီသို့ စုဝေးလာ၏။

အချိန်တိုလေးအတွင်းမှာပင် ထန်းလီ၏ခန္ဓာကိုယ်တစ်ခုလုံးရှိ ကြွက်သားများ၊အကြောများ အားလုံးသည် သူ၏ရင်ဘတ်နေရာတွင် အသားလုံးတစ်ခုအဖြစ် စုစည်းသွားသည်။

ဝမ်လင်း၏မျက်လုံးက အရောင်တောက်လာပြီး ညာလက်ကို ဝေ့ရမ်းကာ နောက်ထပ်နည်းစနစ်တစ်ခုကို အသုံးပြုလိုက်သည်။ ထိုအခါ အသားလုံးကြီးက ထန်းလီ၏ကိုယ်မှ ခွဲထွက်လာ၏။ ယခုအချိန်တွင် ထန်းလီ၏ခန္ဓာကိုယ်သည် အရိုးများထည့်ထားသော အိတ်တစ်ခုနှင့် တူနေ၏။

ဝမ်လင်းက စိတ်စွမ်းအင်များကို ပါးစပ်အပြည့် ထွေးထုတ်လိုက်ပြီး အသားလုံးထဲသို့ ဝင်သွားစေလိုက်သည်။ ထိုအခါ အသားလုံးကြီးက တဖြည်းဖြည်း ကျုံ့လာပြီး သွေးလုံးနှင့် အရွယ်အစားတူသောအခါ ကျုံ့နေခြင်းမှ ရပ်တန့်သွား၏။

ဝမ်လင်းလည်း ပင်ပန်းလာသဖြင့် ဘူးသီးခြောက်ကို ထုတ်ယူပြီး စိတ်ဝိညာဉ်ရေများကို သောက်သုံးကာ အားဖြည့်လိုက်သည်။ ထို့နောက် ထန်းလီ၏ခန္ဓာကိုယ်ကို လက်က ညွှန်လိုက်သည်။

ရုတ်တရက် ကွဲကြေသွားသည့်အသံများ ထွက်ပေါ်လာသည်။ ထန်းလီ၏ခန္ဓာကိုယ်ထဲမှ အရိုးများအားလုံး တစ်စစီဖြစ်ကာ အမှုန့်ဖြစ်သွားပြီး အရိုးမှုန့်အလုံးကြီးအဖြစ် စုစည်းသွား၏။

သွေးလုံး၊အသားလုံး၊အရိုးလုံး ၃လုံးသည် ဝမ်လင်း၏ရှေ့တွင် တန်းစီနေသည်။ ထိုအလုံး၃လုံးမှ မိစ္ဆာဆန်သောအော်ရာများ ထွက်ပေါ်နေသည်။

အလုံး၃လုံးကို လုပ်ပြီးနောက် ဝမ်လင်းက သက်ပြင်းချပြီး ရေရွတ်လိုက်သည်… “အခြေခံခိုးယူခြင်းနည်းစနစ်မှာ သွေး၊အသား၊အရိုး၊ဝိညာဉ်၊စိတ်ဝိညာဉ်အရင်းအမြစ် ၅ခုစလုံးကို ထုတ်ဖို့လိုတယ်… ပြီးတော့ သွေး၊အသား၊အရိုးတွေကို ထုတ်ယူနေချိန်မှာ အထုတ်ခံရတဲ့သူက မသေနိုင်သေးဘူး… ဒီနည်းစနစ်က အရမ်းကို ရက်စက်လွန်းတယ်… “

စစ်ထူနန်က ဖြည်းညှင်းစွာ ပြောလိုက်သည်… “ဒါက ဘာမှမဟုတ်သေးဘူး… ငါနေခဲ့တဲ့ တိုင်းပြည်မှာဆိုရင် အမြုတေခိုးတဲ့ မိစ္ဆာဂိုဏ်းတွေတောင် အများကြီး ရှိတယ်… ဒါကမှ ရက်စက်တယ်လို့ ခေါ်တယ်… အမြုတေ ထုတ်ယူခံလိုက်ရတဲ့လူကလည်း ဝေဒနာခံစားရရုံတင် မဟုတ်ဘူး… ထုတ်ယူတဲ့လူကလည်း ဝေဒနာခံစားရတယ်… ပြီးတော့ အောင်မြင်နှုန်းက ၁ရာခိုင်းနှုန်းတောင် မရှိဘူး… “

ဝမ်လင်းက အနည်းငယ် စဉ်းစားလိုက်ပြီးနောက် လက်ရှိလုပ်နေသည့်အလုပ်အပေါ် အာရုံစိုက်လိုက်သည်။ သူ့လက်ကို ထန်းလီကို ညွှန်လိုက်ပြီး လင်္ကာကို ရွတ်ဆိုလိုက်သည်။ ဝမ်လင်းရွတ်နေသည့်လင်္ကာက တဖြည်းဖြည်း မြန်လာသည့်အချိန်တွင် ထန်းလီ၏ကိုယ်ထဲမှ ထုတ်ထားသော အသားလုံးထဲမှ အဖြူရောင်အငွေ့များ ထွက်လာ၏။

အချိန်ကြာလာသည်နှင့်အမျှ အဖြူရောင်အငွေ့များက အလွန်သိပ်သည်းလာပြီး ခပ်သေးသေးလူပုံစံ ဖြစ်ပေါ်လာသည်။ ထိုလူသေးသေးလေးကို သေချာ နီးနီးကပ်ကပ် ကြည့်လိုက်မယ်ဆိုလျှင် ထန်းလီနှင့် တူနေသည်ကို တွေ့ရပေမည်။ ထိုအရာက ထန်းလီ၏ဝိညာဉ်ဖြစ်သည်။

ထန်းလီဝိညာဉ်၏မျက်လုံးတွင် စိတ်ရှုပ်ထွေးသည့် အရိပ်အယောင်များ ပေါ်နေပြီးနောက် သူ၏ခန္ဓာကိုယ်က တုန်ခါသွား၏။ သူ့မျက်လုံးမှ စိတ်ရှုပ်ထွေးသည့်အရိပ်အယောင်များက ပျောက်ကွယ်သွားပြီး ဝမ်လင်းကို ဒေါသတကြီး ကြည့်ကာ အော်ပြောလိုက်သည်။ ထန်းလီဝိညာဉ်၏ အော်ဟစ်ပြောဆိုသံများက အလွန်ကို တိုးညှင်းလှ၏။

ဝမ်လင်းက မျက်တောင်ပင် မခတ်ဘဲ သူ့အလုပ်ကို ဆက်လုပ်နေသည်။ သူ့လက်ကို ဝေ့ရမ်းလိုက်ပြီးနောက် အနီရောင်အလင်းတန်းတစ်ခု ပေါ်ထွက်လာသည်။ ထိုထန်းလီ၏ဝိညာဉ်က အနီရောင်အလင်းတန်းကို ကြောက်နေသည့်ဟန် ရှိပြီး အနီရောင်အလင်းတန်းနှင့် မထိတွေ့စေရန် ထွက်ပြေးလိုက်၏။ သို့သော်လည်းပဲ ထန်းလီ၏ခန္ဓာကိုယ်နှင့် ၃မီတာပတ်လည် အကွာအဝေးက လှောင်အိမ်တစ်ခုကဲ့သို့ ဖြစ်နေပြီး ထန်းလီ၏ဝိညာဉ်က ဘယ်လိုပင် ထွက်ပြေးရန် ကြိုးစားပါစေ ၃မီတာထက်ပိုပြီး ကျော်လွန်၍ သွားလို့ မရချေ။

နောက်ဆုံးတွင် ထန်းလီ၏ဝိညာဉ်က မလွတ်မြောက်နိုင်တော့သည်ကို သိလိုက်ပြီး ကြောက်စရာကောင်းသည့် အကြည့်ဖြင့် အနီရောင်အလင်းတန်းဆီသို့ ပြေးဝင်သွားလိုက်၏။

ဝမ်လင်းက မျက်နှာသေကြီးဖြင့် သူ့လက်ကို ဝေ့ရမ်းလိုက်ပြီး အနီရောင်အလင်းကို ထန်းလီဝိညာဉ်အား အနည်းငယ် လှည်ပတ်စေပြီးနောက် ထန်းလီဝိညာဉ်ကို အပြင်သို့ ဖြည်းဖြည်းခြင်း ဆွဲထုတ်လာသည်။

ဝိညာဉ်ထုတ်ယူခြင်းအဆင့်က အလွန်အရေးကြီးသည်ကို ဝမ်လင်း သိ၏။ ဝိညာဉ်ကို ခန္ဓာကိုယ်နှင့် ၃မီတာအတွင်းမှ မပျက်မစီးဘဲ ဆွဲထုတ်ရမည် ဖြစ်သည်။ ပျက်စီးသွားသည့်ဝိညာဉ်က အခြေခံခိုးယူခြင်းနည်းစနစ်ကို မထိခိုက်စေသော်လည်း သူ၏ကိုယ်ပိုင်စွမ်းရည်ကို မြှင့်တင်ရန်အတွက် ထန်းလီ၏စိတ်ဝိညာဉ်အရင်းအမြစ်ကို အသုံးပြု၍ မရတော့ပါချေ။

အနီရောင်အလင်းတန်းက သူ့ကို ဆွဲထုတ်နေသည့်အချိန်တွင် ထန်းလီဝိညာဉ်၏မျက်နှာ၌ နာကျင်မှုဖြင့် ပြည့်နေ၏။ တဖြည်းဖြည်းနှင့် ၃မီတာပတ်လည်အတွင်းမှ ထန်းလီဝိညာဉ်၏ခန္ဓာကိုယ်တစ်ဝက်ကျော် ထွက်လာပြီ ဖြစ်သည်။

ထိုအချိန်တွင် ထန်းလီ၏ဝိညာဉ်ခန္ဓာကိုယ်မှ အဝါရောင်အလင်းတစ်ခု ထွက်ပေါ်လာပြီး အနီရောင်အလင်းတန်းကို ဖျက်ဆီးပစ်လိုက်သည်။ ထို့နောက် ထန်းလီ၏ဝိညာဉ်ကလည်း ၃မီတာပတ်လည် အတွင်းသို့ လျင်မြန်စွာ ဆုတ်သွား၏။ အဝါရောင်အလင်း၏တောက်ပမှုကြောင့် ထန်းလီ၏ဝိညာဉ်ကလည်း ပိုမိုသိပ်သည်း မာကျောလာသည်။

ဝမ်လင်း၏မျက်နှာက မည်းမှောင်သွားပြီး ထန်းလီ၏ဝိညာဉ်ကို စိုက်ကြည့်လိုက်သည်။ ထို့နောက် လက်ဖြင့် နည်းစနစ်တစ်ခုကို အသက်သွင်းလိုက်ပြန်သည်။ ထိုအချင်းအရာကို မြင်ပြီး ထန်းလီ၏ဝိညာဉ်သည် ထိတ်လန့်ကြောက်ရွံ့သည့်အမူအရာများ ပေါ်လာ၏။

“မင်း ငါ့ကို သတ်ရင်… ငါ့အဘိုးကလည်း မင်းကို အလွတ်ပေးမှာ မဟုတ်ဘူး… ငါ့အဘိုးက စဦးစိတ်ဝိညာဉ်အဆင့်ပဲ… ဒါ့ကြောင့် မင်း ငါ့ကို သတ်ရင်… မင်းလည်း ကျိန်းသေ သေရလိမ့်မယ်… “

ထိုစကားကို ကြားပြီး ဝမ်လင်း၏မျက်လုံးထဲတွင် အေးစက်သောအလင်းရောင်တစ်ချက် လက်သွားပြီး စိတ်စွမ်းအင်းများကို ထွေးထုတ်လိုက်၏။ ထို့နောက် နည်းစနစ်တစ်ခုကို သုံးပြီး စိတ်စွမ်းအင်များကို ကြိုးတစ်ချောင်းအဖြစ် ပြောင်းလဲသွားစေလိုက်သည်။

ထန်းလီ၏ဝိညာဉ်သည် ကြောက်လန့်လာပြီး‌ ပြောလိုက်သည်… “ငါ့ရဲ့အဘိုးက ငါ ဒုက္ခရောက်နေတာကို သိပြီးပြီ… ဒါ့ကြောင့် သူက ဒီနေရာကို အချိန်မရွေးရောက်လာလိမ့်တယ်… မင်း… “

သူ ပြောလို့မပြီးခင်မှာတင် ဝမ်လင်းက လက်ကို ဝေ့ရမ်းလိုက်၏။ ကြိုးက ထန်းလီ၏ဝိညာဉ်ကို ချည်နှောင်လိုက်ပြီး ၃မီတာပတ်လည်အတွင်းမှ ဖြည်းဖြည်းချင်း ဆွဲထုတ်လိုက်သည်။

ထန်းလီ၏ဝိညာဉ်ကလည်း အပြင်းအထန် ရုန်းကန်နေရင်း စူးစူးဝါးဝါးအော်လေတော့၏… “အဘိုး… ငါ့ကို ကယ်ပါ… “ အဝါရောင်အလင်းကလည်း ပိုမိုလင်းလာပြီး ဝမ်လင်းကို ခုခံ၏။

ဝမ်လင်းလည်း နည်းနည်း အခက်ကြုံနေတာကို မြင်ပြီး သိုလှောင်အိတ်ကို လက်ဖြင့် ပုတ်လိုက်ကာ ဘူးသီးခြောက်ကို ထုတ်ယူလိုက်၏။ သူက စိတ်ဝိညာဉ်ရေကို ပါးစပ်အပြည့် မော့သောက်လိုက်ပြီး ထန်းလီ၏ဝိညာဉ်ကို ဆွဲထုတ်နေသည့် ကြိုးပေါ်သို့ စိတ်စွမ်းအင်ရေများ လောင်းချလိုက်ရာ ကြိုးက ပိုပြီးထူလာကာ ထန်းလီ၏ဝိညာဉ်ကို ထပ်ဆွဲထုတ်ပြန်သည်။

ဒီတစ်ကြိမ်တွင်တော့ ထန်းလီ၏ဝိညာဉ်မှ အဝါရောင်အလင်းသည် မည်မျှပင် တောက်ပပြီး မာကျောပါစေ ဝမ်လင်းကို ခုခံရန် မဖြစ်နိုင်တော့ချေ။ နောက်ဆုံးတွင် ထန်းလီ၏ဝိညာဉ်ကို ၃မီတာပတ်လည်အတွင်းမှ အောင်မြင်စွာ ထုတ်ယူနိုင်လိုက်၏။ ထန်းလီ၏ဝိညာဉ် အပြင်ကို ထုတ်ခံလိုက်ရသည်နှင့် အဝါရောင်အလင်းက အဝါရောင်အငွေ့ထုကြီး ဖြစ်သွားကာ အထဲတွင် ပုံရိပ်တစ်ခု ဖြစ်ပေါ်လာသည်။ ထိုပုံရိပ်က မကြည်မလင် ဖြစ်နေပြီး အသံတစ်ခု ထွက်ပေါ်လာ၏… “ကျင့်ကြံသူလေး… ကျေးဇူးပြုပြီး ရပ်ပေးလို့ ရမလား… ငါတို့ ဒီအကြောင်းကို ဆွေးနွေးရအောင်… “

ဝမ်လင်းက အလန့်တကြားဖြစ်သွား၏။ သို့သော်လည်း စစ်ထူနန်က လျင်မြန်စွာ ပြောလိုက်သည်… “မစိုးရိမ်နဲ့…ဒါက စဦးစိတ်ဝိညာဉ်အဆင့် ကျင့်ကြံသူရဲ့ ပုံရိပ်ယောာင်ကိုယ်ပွားတစ်ခုပဲ… ဒါက ရိုးရိုးကိုယ်ပွားနဲ့ မတူဘူး… ဒီပုံရိပ်ယောင်ကိုယ်ပွားက တိုက်ခိုက်လို့ မရဘူး… မင်းကို မမြင်နိုင်ဘူး… ပြီးတော့ မင်းရှိတဲ့ နေရာကိုတောင် မသိနိုင်ဘူး… ပုံရိပ်ယောင်ကိုယ်ပွားက လုပ်နိုင်တာ တစ်ခုပဲ ရှိတယ်… အဲ့တာက သူပြောတဲ့စကားကို မင်း ကြားအောာင် လုပ်ပေးနိုင်တာပဲ… ပြီးတော့ ဒီပုံရိပ်ယောင်ကိုယ်ပွားရဲ့ ပုံစံကို ကြည့်ပြီး ပြောရရင် စဦးစိတ်ဝိညာဉ်အဆင့်ကျင့်ကြံသူက ဒီနေရာနဲ့ အဝေးကြီးမှာ ရှိနေတယ်… ဒါ့ကြောင့်လည်း ပုံက ဝါးနေတာ… ဘာပဲဖြစ်ဖြစ် သူက ထန်းလီကိုတော့ တော်တော်ချစ်တာပဲ… ဒါ့ကြောင့် သူ့ရဲ့နတ်ဘုရားစိတ်အာရုံအပိုင်းအစလေးကို ထန်းလီနဲ့ ထည့်ပေးထားတာ… “

စစ်ထူနန်၏ စကားကို ကြားပြီးသည်နှင့်‌ တွေဝေနေခြင်း မရှိဘဲ ထန်းလီ၏ဝိညာဉ်ကို လက်ဖြင့် ညွှန်လိုက်၏။ ထန်းလီ၏ဝိညာဉ်က ချက်ချင်း ရပ်တန့်သွားပြီး အပြင်းအထန် ရုန်းကန်နေသည်။ ထန်းလီ၏ဝိညာဉ်က တဖြည်းဖြည်း ကျုံ့သွားပြီး နောက်ဆုံးတွင် ခရမ်းရောင်တောက်ပနေသည် အလုံးတစ်လုံး အဖြစ်သို့ ရောက်သွား၏။

ပုံရိပ်ယောင်ကိုယ်ပွားက ထန်းလီ၏ဝိညာဉ် သန့်စင်ခံလိုက်ရသည်ကို သတိပြုမိသွားပြီး အော်ပြောလိုက်သည်… “ထန်းမိသားစုဝင်တစ်ယောက်ကို မင်းက သတ်ရဲတယ်ပေါ့… မင်း ပြန်ပေးဆပ်ရမယ်… ငါ မင်းကို ရှာတွေ့တဲ့တစ်နေ့… ငါ မင်းကို သတ်မယ်… “

…………………………………………………….

ဝမ်လင်းရှိနေသည့်နေရာမှ မိုင်တစ်သောင်းမက ဝေးသောတောင်ထိပ်တစ်ခုပေါ်တွင် အနက်ရောင်ဝတ်ရုံကို ခြုံထားသော အဘိုးကြီးတစ်ယောက် သုန်မှုန်နေသော မျက်နှာထားဖြင့် မတ်တပ်ရပ်နေသည်။ သူက လက်သီးကို ကျစ်ကျစ်ပါအောင် ဆုပ်ထားပြီး ရေရွတ်လိုက်၏… “လီအာ…မြေးအတွက် အဘိုးပြန်လက်စားချေပေးပါ့မယ်… “

ထို့နောက် သူက ညာလက်ဖြင့် ရင်ဘတ်ကို ရိုက်ကာ သွေးမည်းများ အန်ထုတ်လိုက်သည်။ သူ၏ညာလက်ကပဲ လျင်မြန်စွာ သွေးမည်းများဖြင့် လေထဲတွင် သင်္ကေတများ ရေးဆွဲလိုက်၏။ ရေးဆွဲပြီးသွားသောအခါ ထူးဆန်သောသင်္ကေတများက လေထဲတွင် ရပ်တန့်နေသည်။

ထို့နောက် ခရမ်းရောင်လူသေးသေးလေးတစ်ယောက်က လေထဲတွင် ထိုင်လျက် ပေါ်လာသည်။

လူသေးသေးလေးက အော်လိုက်သည်… “ကျိန်စာ… ဖြစ်ပေါ်စမ်း… “

သူ၏လက်များက အစီအရင်တစ်ခုကို ရေးဆွဲလိုက်ပြီး သူ၏နတ်ဘုရားစိတ်အာရုံကို ခွဲထုတ်ကာ သင်္ကေတများအားလုံးနှင့် ပေါင်းစပ်ရောနှောသွား၏။

“ကျိန်စာ… ပြီးဆုံးခြင်း… “

အဘိုးကြီး၏ဝိညာဉ်က သိသိသာသာကို ကျုံ့သွား၏။ သူ့ပုံစံက သူ၏စွမ်းအားများ ဆုံးရှုံးသွားသည်ကို ဂရုမစိုက်သည့်ပုံစံမျိုး ဖြစ်သည်။ သင်္ကေတများက နတ်ဘုရားစိတ်အာရုံနှင့် ပေါင်းစပ်သွားပြီးနောက် မိစ္ဆာဆန်ဆန်အလင်းရောင်များ တောက်ပလာပြီး ကောင်းကင်ပေါ်တွင် ရပ်တန့်နေ၏။ ထိုသင်္ကေတများက ကောင်းကင်တစ်ဝက်လောက်ထိ ဖုံးလွှမ်းသွားပြီး အစီအရင်တစ်ခု ဖြစ်ပေါ်လာသည်။ အစီအရင်ကြောင့် မိုးချိန်းသံများကလည်း ထွက်ပေါ်လာသည်။

“ကျိန်စာ… လှည့်လိုက်စမ်း… “

အစီအရင်က တစ်ဖြည်းဖြည်း လည်လာ၏။ အစီအရင်က လည်ရင်းလည်ရင်း ကောင်းကင်ပေါ်တွင် သွေးရောင်တောက်ပနေသော လျှပ်စီးများ ပေါ်လာပြီး ထူးဆန်းသော စိန်ပုံသဏ္ဍာန်ကို ဖြစ်ပေါ်စေသည်။

“ကျိန်စာ… ပိတ်လိုက်စမ်း… “ လူသေးသေးလေးက အော်လိုက်သည်။ သူ၏ဝိညာဉ်စွမ်းအားများကိုလည်း အစီအရင်ထဲသို့ ထပ်ပေါင်းထည့်လိုက်သဖြင့် အစီအရင်က ပိုပြီး မြန်ဆန်စွာ လည်လာသည်။ သွေးရောင်လျှပ်စီးကလည်း ပိုပိုပြီး မာကြောလာသည်။ မကြာမီ အစီအရင်က ကျုံ့သွားပြီး သွေးရောင်လျှပ်စီးများအားလုံးကို စိန်ပုံသဏ္ဍာန်ပေါ်တွင် တံဆိပ်ခပ်နှိပ်လိုက်၏။

ထို့နောက် စိန်ပုံသဏ္ဍာန်အစီအရင်က ကောင်းကင်ပေါ်မှ ကျလာပြီး လူသေးသေးလေး၏နဖူးပေါ်သို့ ဖိချကာ နဖူးပေါ်တွင် စိန်ပုံသဏ္ဍာန်ကို ပေါ်လာစေသည်။

ထိုလူသေးသေးလေးက သုန်မှုန်နေသောအပြုံးဖြင့် ပြောလိုက်သည်… “မင်းက ထန်းမိသားစုဝင်ကို သတ်ရဲမှတော့… ငါကလည်း မင်းကို ကျိန်စာမိစေရမှာပေါ့… “

………………………………………………..

သစ်ခေါင်းထဲတွင် ဝမ်လင်း၏ရှေ့ရှိ လေထဲတွင် အလုံး၄လုံးက ရပ်တန့်နေသည်။ သူက ထန်းလီ၏ခန္ဓာကိုယ်မှ ကျန်ရှိနေသော အစိတ်အပိုင်းအားလုံးကို လက်ဖြင့် ညွှန်လိုက်ရာ ထိုအစိတ်အပိုင်းများမှ ရွှေရောင်အမှုန်များ အများအပြား ထွက်လာသည်။

ထိုအမှုန်များက အလွန်များပြားပြီး ၃ပုံ၁ပုံက ပတ်ဝန်းကျင်သို့ ပျံ့နှံ့ကာ ပျောက်ကွယ်သွား၏။

ဝမ်လင်းက အသက်ဝအောင် ရှူလိုက်သည်။ ထိုရွှေရောင်အမှုန်များက စိတ်ဝိညာဉ်အရင်းအမြစ်များ ဖြစ်သည်ကို သူ သိနေသည်။ ထို့ကြောင့် သူက စိတ်စွမ်းအင်များကို ပါးစပ်ထဲမှ ထုတ်ပြီး စိတ်ဝိညာဉ်အရင်းအမြစ်များကို ဝါးမြိုလိုက်သည်။ စိတ်ဝိညာဉ်အရင်းအမြစ်က ဝမ်လင်း၏ဝါးမြိုမှုကို ငြင်းဆန်သည့်အတွက် နောက်ထပ် ၃ပုံ၁ပုံလည်း ပျောက်ကွယ်သွားရပြန်သည်။ ဝမ်လင်းက ထန်းလီ၏စိတ်ဝိညာဉ်အရင်းအမြစ်ကို ၃ပုံ၁ပုံသာ ဝါးမြိုလိုက်နိုင်၏။

ထိုအချိန်တွင် ဝမ်လင်း၏နဖူးပေါ်က တောက်ပလာပြီး နဖူးပေါ်တွင် ခရမ်းရောင်စိန်ပုံသဏ္ဍာန်တစ်ခု ပေါ်လာသည်။

ဝမ်လင်းက သူ့နဖူးတွင် တစ်ခုခု ဖြစ်သွားသည်ကို သတိပြုမိပြီး နဖူးကို လက်ဖြင့် စမ်းကြည့်လိုက်ရာ သူ့မျက်နှာက ချက်ချင်း ပျက်ယွင်းသွား၏။

စစ်ထူနန်က အံ့အားသင့်စွာ ပြောလိုက်သည်… “ဒီလူကတော့ တစ်ကယ်ပါပဲ… ဝမ်လင်း…မင်းတော့ စဦးစိတ်ဝိညာဉ်အဆင့်ကျင့်ကြံသူရဲ့ ကျိန်စာ ခတ်ခံလိုက်ရပြီ… ဒီကျိန်စာနဲ့ဆိုရင် မင်းနဲ့သူက သတ်မှတ်ထားတဲ့အကွာအဝေးတစ်ခု အတွင်းမှာ ရှိနေမယ်ဆိုရင် ချက်ချင်း တည်နေရာပြောင်းရွေ့ခြင်းနဲ့ သူက မင်းနားကို ရောက်လာလို့ရတယ်… ဒီကျိန်စာကို လုပ်ဖို့ သူ့ရဲ့ဘဝသက်တမ်းကို အဆုံးရှုံးခံလိမ့်မယ်လို့ ငါ မထင်ထားခဲ့ဘူး… “

ဝမ်လင်းက ရုတ်တရက် မတ်တပ် ထရပ်လိုက်သည်။ သူ့မျက်နှာက သုန်မှုန်နေပြီး မေးလိုက်သည်… “ဒီကျိန်စာကို ဖျက်ဆီးဖို့ နည်းလမ်းရှိလား… “

စစ်ထူနန်က အနည်းငယ် စဉ်းစားပြီး ဂုဏ်ယူဝင်ကြွားစွာ ရယ်မောလိုက်သည်… “ဒီကျိန်စာကို မစိုးရိမ်ပါနဲ့… ဒီလိုကျိန်စာမျိုးက လူကို ဘာမှ ထိခိုက်အောင် မလုပ်နိုင်ဘူး… ဒါက မင်းဘေးနားကို တည်နေရာပြောင်းရွေ့ခြင်းနည်း အသုံးပြုပြီး လာလို့ရအောင် လုပ်ပေးတာပဲ ရှိတယ်… ဒီလိုကျိန်စာမျိုးတွေကို အရင်က အချိန်ပေးပြီး လေ့လာခဲ့ဖူးတယ်… ကျိန်စာကို ဖျက်ဖို့အတွက်က အခုချိန်မှာ ငါ မလုပ်ပေးနိုင်သေးဘူး… ဘာလို့လဲဆိုတော့ ငါ့မှာခန္ဓာကိုယ် မရှိသေးလို့ပဲ… ဒါပေမဲ့ ဒါကို ဖုံးကွယ်ပေးထားဖို့တော့ ကူညီနိုင်ပါသေးတယ်… “

“ငါရဲ့ အကူအညီနဲ့ မင်းရဲ့ အော်ရာကို ဖုံးကွယ်ထားပေးမယ်… မင်းက သူနဲ့ အရမ်းမနီးကပ်ဖူးဆိုရင် သူ မင်းကို ရှာမတွေ့နိုင်ဘူး… ဟီးဟီး… ဝမ်လင်း ဒီကျိန်စာက အသုံးဝင်တာ တစ်ခုရှိတယ်… ငါ သိထားတဲ့ ရှေးဟောင်းနည်းစနစ်တစ်ခုက ကျိန်စာခတ်တဲ့သူကို ပြန်ပြီး အကျိုးသက်ရောက်စေနိုင်တယ်… ဒါပေမဲ့ မင်းက အမြုတေအဆင့်ကို ရောက်မှ ဒါကို သုံးနိုင်လိမ့်မယ်… ဆေးတစ်ချို့ရယ် ငါ့ရဲ့နည်းစနစ်ကို ပေါင်းပြီး အသုံးပြုလိုက်မယ်ဆိုရင် သူ့ရဲ့ကျင့်စဉ်တစ်ဝက်ကို ယူလိုက်လို့ရတယ်… ဝမ်လင်း…မင်းရဲ့ကံက တစ်ကယ်ကို ကောင်းတာပဲ… “

နှောင်ဖွဲ့ခြင်းကင်း တန်ခိုးရှင်

ဘာသာပြန် ... Oo Zaw

အပိုင်း (၈၆) သစ်တောထဲမှ အပျက်အစီးများ

ဝမ်လင်းက အနည်းငယ် စဉ်းစားလိုက်ပြီး ထန်းလီ၏ ဝိညာဉ်ကို စုပ်ယူရန် ပြင်ဆင်လိုက်သောအခါ ထန်းလီ၏ဝိညာဉ်အလုံးက ဖောင်းပွလာ၏။

သွေးလုံးကလည်း ဝိညာဉ်လုံးထဲသို့ ရောက်သွားပြီး ရောနှောသွား၏။ တဖြည်းဖြည်းနှင့် ဝိညာဉ်အလုံးက ပြန်ကျုံ့သွား၏။ ထို့နောက် အသားလုံးနှင့်အရိုးလုံးသည်လည်း ဝိညာဉ်အလုံးထဲသို့ ပေါင်းစပ်သွားသည်။

အားလုံးပေါင်းစပ်ပြီးနောက် ဝိညာဉ်အလုံးက အကြီးအကျယ် ပြောင်းလဲသွား၏။

ယခုအချိန်တွင် ဝမ်လင်း၏ရှေ့ရှိ လေထဲတွင် လင်းလက်နေသော လက်စွပ်အရွယ်အစားရှိသော ကွင်းတစ်ခုသာ ရှိ၏။

နောက်ဆုံးအဆင့်ကို ရောက်နေပြီ ဖြစ်၍ ဝမ်လင်းက အသက်ကို ဝအောင် ရှူလိုက်သည်။ ထို့နောက် ကွင်းလေးထဲသို့ သူ၏ဝိညာဉ်ကို ဂရုတစိုက်ဖြင့် ထည့်လိုက်၏။

အချိန်တော်တော်ကြာပြီးနောက်တွင် ရုတ်တရက် ကွင်းလေးက လွန်စွာ တောက်ပလာ၏။ ထိုအချင်းအရာကို မြင်ပြီး ဝမ်လင်း၏မျက်လုံးမှ အရောင်တောက်သွား၏။ တစ်ချိန်တည်းမှာပင် လျှာကို ကိုက်လိုက်ပြီး သွေးများကို ထွေးထုတ်လိုက်သည်။ သွေးများက ကွင်းလေးနှင့် ထိသွားပြီး တရှဲရှဲမြည်သံများ ထွက်ပေါ်လာကာ သွေးများအားလုံးက ချက်ချင်း ပျောက်ကွယ်သွား၏။

ကွင်းလေးက ဝမ်လင်း၏သွေးများနှင့် ပေါင်းစပ်သွားပြီးနောက် တုန်ခါလာသည်။ ကွင်းလေးမှ အလွန်အားကောင်းကို ဖိအားတစ်ခုကို ထုတ်လွှတ်လေသည်။ ထိုဖိအားက ၁ကီလိုမီတာအတွင်းရှိ သက်ရှိများအားလုံးအပေါ် သက်ရောက်၏။ ဝမ်လင်းလည်း ချက်ချင်း ပြောင်းလဲမှုကို သတိပြုမိလိုက်သည်။

များစွာသော စွမ်းအားကောင်းသည့်အော်ရာများလည်း ထွက်ပေါ်လာပြီး ဝမ်လင်းဆီသို့ ပြေးဝင်သွားကြ၏။

ဝမ်လင်းက လက်ကို ဝေ့ရမ်းလိုက်ပြီး ကွင်းကို သူ့ရင်ဘတ်နှင့် ပေါင်းစပ်စေသည်။ ကွင်းက သူ၏ရင်ဘတ်အတွင်းသို့ ဝင်သွားပြီးသည်နှင့် စိတ်စွမ်းအင်များက တဟုန်ထိုး တိုးပွားလာပြီး သူ့တစ်ကိုယ်လုံးကို စီးဆင်းသွား၏။ ထို့အတူ သူ့မျက်နှာကလည်း နီရဲလာသည်။

ဝမ်လင်းက အသက်ကို ပြင်းပြင်းရှိုက်လိုက်ပြီး သစ်ခေါင်းထဲမှ ထွက်ကာ သစ်တောထဲသို့ ပြေးဝင်ပျောက်ကွယ်သွား၏။

သူထွက်သွားပြီး သိပ်မကြာခင် ကြီးမားသောစပါးအုံးမြွေကြီးတစ်ကောင် ရောက်လာပြီး နေရာတစ်ခုလုံးကို အနံ့လိုက်ခံကြည့်သည်။ ထို့နောက် စိတ်ရှုပ်ထွေးသည့်အမူအရာဖြင့် ခေါင်းကို ခါပြီး ထိုနေရာမှာ ထွက်ခွာသွား၏။

မြွေကြီးထွက်သွားပြီးနောက် မျောက်ဝံကြီးတစ်ကောင်က လျှပ်စီးကဲ့သို့ ရောက်လာပြီး သစ်ခေါင်းထဲသို့ ဝင်သွား၏။ အချိန်အနည်းငယ်ကြာအောင် ရှာပြီးနောက် စိတ်ရှုပ်ထွေးသည့်အမူအရာဖြင့် ပြန်ထွက်လာပြီး ထိုနေရာမှ ထွက်ခွာသွား၏။

စွမ်းအားကြီးသော သားရဲတချို့လည်း ရောက်လာပြီး စိတ်ရှုပ်ထွေးသည့်အမူအရာများနှင့် ပြန်ထွက်သွားကြသည်။

ဝမ်လင်းက တောအုပ်ထဲတွင် ပြေးလွှားနေသည်။ သူ၏ခန္ဓာကိုယ်ထဲတွင် စိတ်စွမ်းအင်များဖြင့် ပြည့်နေသည့်အပြင် ပြေးသည့်အခါ ခြေလှမ်းတိုင်းတွင် သူ၏ခန္ဓာကိုယ်ရှိ မွှေးညှင်းပေါက်များအားလုံးမှ အမဲရောင်အရည်များ စိမ့်ထွက်နေ၏။

ဝမ်လင်းသည် သူ့တစ်ကိုယ်လုံး နာကျင်စုတ်ပြဲနေသကဲ့သို့ ခံစားနေရသည်။ ထို့ကြောင့် နောက်ဆုံးတွင် ပြေးလွှားနေခြင်းမှ ရပ်တန့်ကာ အနီးအနားကို လျှောက်ပတ်ပြီး ကြည့်လိုက်သည်။ ရုတ်တရက် သူ့မျက်လုံးက အရောင်တောက်သွားပြီး ဆွဲငင်အားပညာရပ်ဖြင့် လက်ကြီးနှစ်ဖက်ကို ဖန်တီးကာ မြေပြင်ကို စတင်ပြီး တူးလိုက်သည်။ သူ၏ကိုယ်ထဲတွင် စိတ်စွမ်းအင်များက လွန်စွာပြည့်ဝများပြားနေသဖြင့် တူးရတာ မမောပန်းဘဲ မြန်ဆန်နေသည်။

မကြာမီ အလွန်နက်ရှိင်းလှသော ချိုင့်တွင်းကြီးတစ်ခု ဖြစ်သွား၏။

ဝမ်လင်းက ချိုင့်တွင်းထဲသို့ ခုန်ချလိုက်ပြီး မြေကြီးများကို ချိုင့်တွင်းထဲသို့ ပြန်ဖို့လိုက်၏။ ထိုအခါ အရာအားလုံးက ဘာမှမဖြစ်ခဲ့သည့်အတိုင်း ပုံမှန်အခြေအနေသို့ ပြန်ရောက်သွားသည်။

မြေအောက်ထဲတွင် ဝမ်လင်းက သူ့ကိုယ်ထဲမှ စိတ်စွမ်းအင်များအပေါ် အာရုံစိုက်ထားလိုက်သည်။ စိတ်စွမ်းအင်များက သူ့ခန္ဓာကိုယ်ကို ဆက်တိုက် သန့်စင်ပေးနေ၏။

မြေအောက်ထဲတွင် ဝမ်လင်းက ဘာအနှောင့်အယှက်မှ မရှိဘဲ ၃ကြိမ်မြောက် တံခါးပိတ်ကျင့်ကြံခြင်းကို စတင်လိုက်သည်။

အချိန်များက တဖြည်းဖြည်း ကုန်ဆုံးလာပြီး ၂နှစ်ဆိုသည့်အချိန်ကို ကျော်ဖြတ်လာ၏။

ဝမ်လင်းကျင့်ကြံနေသည့်နေရာ၏အပေါ် မြေပြင်ထက်၌ ပုပ်သိုးဆွေးမြေ့နေသော သစ်ရွက်များဖြင့် ပြည့်နေပြီး အဆိပ်ရှိသောပိုးမွှားများကလည်း သစ်ရွက်များကြား သွားနေကြသည်။

တစ်ရက်တွင် မြေပြင်က ရုတ်တရက် တုန်ခါလာသည့်အတွက် အဆိပ်ရှိသောပိုးကောင်များအားလုံး သစ်ရွက်များကြားမှ အလုအယက် ထွက်ပြေးကြ၏။ ထို့နောက် သစ်ရွက်ဆွေးများက အထက်သို့ လွင့်ပျံသွားပြီး မြေအောက်မှ ပုံရိပ်တစ်ခု ထိုးထွက်လာသည်။

ပုံရိပ်ပေါ်ထွက်လာသည်နှင့် ပိုးကောင်များအားလုံးက ကြောက်လန့်တကြားအော်ဟစ်ပြီး ထိုနေရာမှ ထွက်ပြေးကြ၏။

“ဒီအခြေခံခိုးယူခြင်းနည်းစနစ်က တစ်ကယ်ကို ထူးခြားဆန်းကျယ်တာပဲ… နောက်ဆုံးတော့ ငါလည်း ခန္ဓာကိုယ်သန့်စင်ခြင်းအဆင့်ကို ရောက်သွားပြီ… “ မြေအောက်မှ ထွက်လာသော ပုံရိပ်ကား ဝမ်လင်း ဖြစ်၏။

ဝမ်လင်း၏အကြည့်က လျှပ်စစ်နှင့် တူနေပြီး တစ်ကိုယ်လုံးတွင်လည်း အားကောင်းသော စိတ်စွမ်းအင်များဖြင့် ပြည့်နေသည်။ သူက ပါးစပ်ကို ဟလိုက်ပြီး အစိမ်းရောင်အလင်းကို ထုတ်လိုက်၏။ ထို့နောက် အစိမ်းရောင်အလင်းက အစိမ်းရောင်ဓားတစ်ချောင်းအဖြစ်သို့ ပြောင်းလဲသွားသည်။

ဝမ်လင်းက လက်ကို မြောက်လိုက်ရာ ဓားအိမ်ပေါ်လာပြီး သူ့ဘာသာ ရေရွတ်လိုက်သည်… “ဒီဓားအိမ်ကို ၂နှစ်ကြာအောင် သန့်စင်တာတောင်မှ အကုန်အစင် မသန့်စင်နိုင်ပေမဲ့လည်း ငါ့ဟာ ဖြစ်နေပြီလို့ ပြောလို့ရတယ်… ဒါကိုသာ ဓားနဲ့ တွဲပြီး အသုံးပြုလိုက်ရင် ဓားရဲ့အစွမ်းက အရမ်းကြောက်ဖို့ ကောင်းသွားမှာပဲ… “

ဝမ်လင်းက ဓားနှင့်ဓားအိမ်ကို သိမ်းလိုက်ပြီးနောက် အနည်းငယ် စဉ်းစားလိုက်သည်။ ထို့နောက် ရင်ဘတ်မှ ပုတီးစေ့ကို စမ်းပြီး တွေးလိုက်သည်… “စစ်ထူနန်က ငါ့ကို ထန်းလီလက်က ကယ်ဖို့ စဦးစိတ်ဝိညာဉ်အဆီအနှစ်အများကြီး သုံးခဲ့ရတယ်… ထန်းဟွယွမ်ရဲ့ကျိန်စာကနေလည်း ကာကွယ်ပေးထားသေးတယ်… အခု သူအိပ်ပျော်နေတာ ၁နှစ်ကျော်ပြီ… သူ ဘယ်အချိန်မှ ပြန်နိုးလာမလဲ ငါလဲ မသိဘူး… တစ္ဆေလောကပျံတက်ခြင်းနည်းစနစ်ကို မှတ်မိနေလို့ ကံကောင်းသွားတယ်… အခု ယင်စွမ်းအင်များတဲ့နေရာရှာပြီး လေ့ကျင့်ရမယ်… “

ထို့နောက် အသက်ကို ဝအောင်ရှူပြီး နတ်ဘုရားစိတ်အာရုံကို ဖြန့်ကျက်ကာ မြောက်အရပ်သို့ ထွက်ခွာသွား၏။ မကြာမီ မြစ်ချောင်းတစ်ခုကို တွေ့ပြီး မြစ်ချောင်းထဲတွင် သူ့ကိုယ်မှ အညစ်အကြေးများအားလုံးကို ဆေးကြောလိုက်၏။ သူ၏တစ်ကိုယ်လုံးသန့်စင်သွားပြီးနောက် ဝမ်လင်းက လန်းဆန်းသွားသကဲ့သို့ ခံစားလိုက်ရသည်။

မြစ်ချောင်းအနီးရှိ ကျောက်တုံးတစ်တုံးပေါ်တွင် ထိုင်ပြီး သေခြင်းတရားနှင့် နီးကပ်ခဲ့ရသည့် အကြောင်းများအား တွေးမိကာ အများကြီး နောင်တရမိသည်။ ကျန်းဟူ အသက်ရှင်သေးလား သို့မဟုတ် သေသွားပြီးလားဆိုတာကို သူမသိချေ။ ကျန်းဟူ အသက်ရှင်ပြီး လွတ်မြောက်သွားပါစေဟုသာ ဆုတောင်းလိုက်တော့သည်။

ထို့နောက် သက်ပြင်းချလိုက်ပြီး အတွေးများကို သိမ်းဆည်းလိုက်၏။ ဝမ်လင်းက ညာဘက်လက်ဖြင့် အစီအရင် တစ်ခုကို ဖန်တီးပြီး အဖြူရောင်အလင်းတန်းတစ်ခုကို ထုတ်ဖော်လိုက်သည်။ အဖြူရောင်အလင်းက ထွက်ပေါ်လာသည်နှင့် ချက်ချင်း အရောင်ပြောင်းသွား၏။ အဖြူမှ မီးခိုးရောင်သို့ ပြောင်းသွားပြီး တဖြည်းဖြည်း နက်မှောင်လာကာ အနောက်အရပ်သို့ ပျံသန်းသွားသည်။

ဝမ်လင်းလည်း မှင်သက်သွား၏။ ဤနည်းစနစ်သည် ယင်စွမ်းအင်ရှိသောနေရာကို ရှာရန်အတွက် စစ်ထူနန်က သင်ပေးထားသည့် နည်းစနစ် ဖြစ်သည်။ အဖြူရောင်အလင်းက အနက်ရောင်ဘက်သို့ ပိုပြီးပြောင်းသွားလေလေ ယင်စွမ်းအင်များ ရှိသောနေရာနှင့် နီးလေလေ ဖြစ်သည်။ အဖြူရောင်အလင်းက အနက်ရောင်လုံးလုံး ဖြစ်သွားသည်နှင့် ယင်စွမ်းအားများ ရှိသည့်နေရာကို ရောက်သည်ဟု ဆိုလိုခြင်း ဖြစ်၏။

ချက်ချင်းပင် ဝမ်လင်းက မီးခိုးရောင်သို့ ပြောင်းပြီးနေသည်ဖြစ်သည့် အလင်းနောက်သို့ လိုက်သွား၏။ အလင်းက တဖြည်းဖြည်း နက်မှောင်လာသည်။ အနက်ရောင်သို့ လုံးဝပြောင်းသွားသည့်အချိန်တွင် အလင်းက ချက်ချင်း ပျောက်ကွယ်သွား၏။

ဝမ်လင်းကလည်း အလင်းပျောက်ကွယ်သွားသည်ကို မြင်ပြီး ချက်ချင်း ရပ်တန့်လိုက်သည်။ သူ့ရှေ့မှ မြင်ကွင်းကို ကြည့်ပြီး ဆွံ့အနေသည်။

သူ့ရှေ့တွင် အဆုံးမရှိသော အပျက်အစီးများဖြင့် ပြည့်နေသည်။ အဆောက်အဦးများ၊သစ်ပင်များအားလုံး မျက်စိတစ်ဆုံးမြင်ရသည်အထိ ပြိုလဲ၊ပျက်စီးနေ၏။

အပျက်အစီးများကို သဘာဝပေါက်ပင်များက ဖုံးအုပ်ထားပြီး တိရစ္ဆာန်ငယ်လေးများက ဖြတ်ပြေးနေကြသည်။ တစ်ခါတစ်ရံတွင်လည်း အော်သံများ ထွက်ပေါ်လာတတ်၏။

ဝမ်လင်းသည် သူ့ရှေ့မှ အပျက်အစီများကို ကြည့်ပြီး မှင်သက်နေပြီးနောက် လေကို ပြင်းပြင်းရှူလိုက်သည်။

ထိုအချိန်တွင် အပျက်အစီးများကြားထဲရှိ မျှော်စင်တစ်ခုအတွင်းမှ အဖြူရောင်အလင်းတိုင်လုံးတစ်ခု ထွက်ပေါ်လာသည်။

ဝမ်လင်း အလန့်တကြား ဖြစ်သွားကာ မျက်နှာအမူအရာ ပြောင်းလဲသွားပြီး ခေါင်းက တောအုပ်အတွင်းသို့ လှည့်ကြည့်လိုက်၏။ တောအုပ်အတွင်းမှ သွေးများဖြင့် သားရဲငယ်တစ်ကောင်က အလင်းတိုင်လုံး ရှိသည့်နေရာသို့ ဖြည်းဖြည်းခြင်း သွားနေသည်။ သူ၏ညာဘက်ခြေထောက်တွင် ဒဏ်ရာက အရိုးများပင် ပေါ်နေ၏။ သူ လျှောက်လာခဲ့သည့် လမ်းတစ်လျှောက်တွင် သူ့ညာဘက်ခြေထောက်မှ စီးကျနေသည့် သွေးစီးကြောင်းတစ်ခုက ကျန်ရစ်နေခဲ့သည်။

အချိန်တော်တော်ကြာပြီးနောက်တွင် ထိုသားရဲက အဖြူရောင်အလင်းတိုင်လုံးဆီသို့ ရောက်သွားပြီး ပျော်ရွှင်မှုကြောင့် အော်ဟစ်လိုက်၏။ စက္ကန့်အနည်းငယ်ကြာပြီးနောက်တွင် သူ့ခြေထောက်မှ ဒဏ်ရာက အပြည့်အဝ ပြန်ကောင်းသွားသည်။

ထို့နောက် သားရဲက ပျော်ရွှင်စွာ တောအုပ်ထဲသို့ ပြန်သွား၏။

သူ့ရှေ့မှ မြင်ကွင်းကို ကြည့်ပြီး ဝမ်လင်း အံ့အားသင့်နေသည်။

ထိုအချိန်တွင် အလင်းတိုင်က ငွေရောင်အမှုန်အမွှားလေးများအဖြစ် ပြောင်းလဲသွားကာ လေထဲတွင် ပျောက်ကွယ်သွား၏။ ဝမ်လင်းကတော့ ထိုနေရာကို သေချာစောင့်ကြည့်နေသည်။ နာရီဝက်ခန့်ကြာသောအခါ အလင်းတိုင်းက ပြန်ပေါ်လာသည်။

အလင်းတိုင် ပေါ်လိုက်၊ပျောက်လိုက်ဖြစ်နေခြင်းကို ဝမ်လင်းက တစ်နေ့လုံး စောင့်ကြည့်နေခဲ့၏။ ထို့နောက် ဝမ်လင်းက တချို့အရာများကို သိလာခဲ့သည်။

ဝမ်လင်း၏ ထင်မြင်ချက်အရာ အလင်းတိုင်သည် နေရောင်ခြည်နှင့် တစ်နည်းမဟုတ် တစ်နည်း ဆက်စပ်နေရမည်။ ဤနေရာတစ်ခုလုံးသည် ပျက်စီးနေပြီ ဖြစ်သော်လည်း နေရောင်ခြည်ကို စုပ်ယူပြီး အလုပ်လုပ်ဆဲ ဖြစ်နေသည့် အရာများလည်း ရှိနေသေး၏။ ထို့အတူ အလင်းတိုင်ကလည်း နေရောင်ခြင်းကို လုံလောက်အောင် စုပ်ယူပြီးမှ သူ၏စွမ်းရည်ကို ထုတ်ပြခြင်း ဖြစ်ရမည်။

သားရဲတော်တော်များများက အလင်းတိုင်၏စွမ်းအားကို သိနေကြဟန် ရှိသည်။ တစ်နေ့လုံးတွင် သားရဲအကောင်၂၀မက အလင်းတိုင်ဆီသို့ လာပြီး ဒဏ်ရာကုကြသည်ကို ဝမ်လင်း တွေ့ခဲ့ရ၏။

မှောင်လာသောအခါ ဝမ်လင်းက အလင်းတိုင်းနောက်ဆုံး ပျောက်ကွယ်မည့်အချိန်ကို တွက်ချက်ပြီး တုန့်ဆိုင်းခြင်းမရှိ ရှေ့သို့ ပြေးထွက်သွားပြီး အလင်းတိုင်ကို လက်ဖြင့် ထိလိုက်၏။ အလင်းထဲတွင် သူ့လက်က အလွန်နွေးထွေးသည့်ကို ခံစားမိလိုက်သည်။ ဒီအရာက စိတ်စွမ်းအင်များ မဟုတ်ပေ။ သို့သော်လည်း ဒီလိုအရာကို ဝမ်လင်းတစ်ခါမှ မခံစားဖူးပေ။

အလင်းတိုင်မှ နွေးထွေးမှုကို ခံစားရင် ဝမ်လင်း၏မျက်လုံးက အရောင်တောက်သွား၏။ ဝမ်လင်က ချက်ချင်း သူ့လက်ကို လှီးလိုက်ပြီး လက်ကို အလင်းတိုင်းအတွင်းသို့ ထည့်လိုက်၏။ မျက်တောင်တစ်ခတ်အတွင်းမှာတင် သူ့လက်မှ ဒဏ်ရာက ချက်ချင်း ပြန်ကောင်းသွားသည်။

ဝမ်လင်းက အနည်းငယ် စဉ်းစားပြီး အပျက်အစီးများကြားထဲမှာ အကြီးဆုံးမျှော်စင်ဆီသို့ ပြေးသွားလိုက်၏။

မျှော်စင်၏တချို့နေရာများက ပြိုကျပျက်စီးနေပြီ ဖြစ်သော်လည်း မျှော်စင်ကို ကြည့်ပြီး တစ်ချိန်က အလွန်ကြီးကျယ်ခမ်းနားခဲ့သည်ကို သိနိုင်သည်။ ထို့အပြင် ဘေး၌ မီတာ၃၀ခန့်မြင့်သော မျှော်စင်ပေါ်တွင် ဓားကိုင်ပြီး ရပ်နေသော ကြီးမားသောရုပ်ထုကြီး နှစ်ခုလည်း ရှိ၏။

ဝမ်လင်းက အပျက်အစီးများကို ကြည့်ပြီး တွေးကြည့်မိလိုက်သည်။ တစ်ချိန်က ကြီးကျယ်ခမ်းနားခဲ့သော်လည်း ယခုအချိန်တွင် အကြီးဆုံးမျှော်စင်က ထက်ပိုင်းကျိုးနေပြီး တချို့အပိုင်းအစများက ရုပ်ထုနှစ်ခုပေါ်ကို ပြိုလဲကျနေ၏။

အလင်းတိုင်သည် မျှော်စင်ထိပ်မှ ၂မီတာ အချင်းရှိသော ကျောက်တုံးကြီးမှ ထွက်လာခြင်း ဖြစ်သည်။

ဝမ်လင်းက ကျောက်တုံးကြီးဘေးတွင် ရပ်လိုက်ပြီး တုန့်ဆိုင်းနေသည်။ ကျောက်တုံးကြီးက အလွန်ကြီးပြီး ရွေ့နိုင်ရန် မလွယ်ကူလှပေ။ ကျောက်တုံးကြီးက ဘယ်လိုအကြောင်းများကြောင့် ဒဏ်ရာများကို ပြန်လည်ကောင်းမွန်အောင် လုပ်နိုင်သလဲဆိုတာကို သူမသိပေ။ သူသာ ရွေ့လိုက်လျှင် ပြန်လည်ကောင်းမွန်နိုင်သည့်အစွမ်းများ မရှိတော့မှာကို အလွန်စိုးရိမ်နေသည်။

ထိုအကြောင်းကို စဉ်းစားမိပြီး နောက်ဆုံးတွင် အလျင်စလို မလုပ်ရန် ဆုံးဖြတ်လိုက်ကာ တခြားနေရာများကို လေ့လာရန် စတင်လိုက်၏။

ကောင်းကင်ကြီးက ပိုပိုပြီး မှောင်လာသည့်အတွက် ဝမ်လင်းက အပျက်အစီများကြားထဲမှ လျင်မြန်စွာ ထွက်လာခဲ့သည်။ ကောင်းကင်ကြီးက လုံးဝမှောင်သွားသည့်အချိန်တွင် ဝမ်လင်းက တောအုပ်အတွင်းသို့ ပြန်လည်ရောက်ရှိနေပြီ ဖြစ်သည်။ သူက အပျက်အစီးနေရာကြီးကို တောက်ပသောမျက်လုံးများဖြင့် စိုက်ကြည့်နေ၏။

နှောင်ဖွဲ့ခြင်းကင်း တန်ခိုးရှင်

ဘာသာပြန် ... Oo Zaw

အပိုင်း (၈၇) အေးခဲအမြုတေ

ဝမ်လင်း၏စိတ်ထဲတွင် လျှောက်တွေးကြည့်လိုက်သည်။ တစ်ရက်တွင် မိသားစုတစ်ခုက ညစာစားနေတဲ့အချိန်မှာ ဘေးဒုက္ခတစ်ခုက ရုတ်တရက် တိုက်ခိုက်လာမည်။ မြို့ထဲကလူတွေအားလုံး တုန့်ပြန်ချိန် မရလိုက်ဘဲ အားလုံးပျက်စီးဆုံးရှုံးသွားကြမည်။

ထိုအချိန်တွင် အပျက်အစီးများထဲမှ အအေးဓာတ်စွမ်းအင်များက ထွက်ပေါ်လာသည်။ တဖြည်းဖြည်းနှင့် အအေးဓာတ်စွမ်းအင်များက ပိုပြီး သိပ်သည်းသည်ထက် ပိုမို သိသည်းလာသည်။

“ဒီအပျက်အစီးအရွယ်အစားကို ကြည့်ပြီး ဒီမြို့မှာနေထိုင်တဲ့ လူဦးရေက အနည်းဆုံး သန်း၁၀လောက် ရှိလိမ့်မယ်… ဒီလူဦးရေသန်း၁၀ကျော် သေဆုံးသွားတဲ့ ဒီနေရာက တစ္ဆေလောကပျံတက်ခြင်းနည်းစနစ်ကို လေ့ကျင့်ဖို့ အကောင်းဆုံးနေရာတစ်ခုပဲ… “

ဝမ်လင်း တံခါးပိတ်လေ့ကျင့်နေစဉ်တုန်းက စစ်ထူနန်က ယင်ဒြပ်စင်များသိပ်သည်းသောနေရာများအကြောင်းကို ရှင်းပြထား၏။ ယင်သိပ်သည်းသောနေရာ၄မျိုး ရှိသည်။ ၎င်းတို့မှာ ကောင်းကင်ယင်၊ မြေကြီးယင်၊ လျှို့ဝှက်ဆန်းကြယ်ယင်၊ တစ္ဆေယင် တို့ ဖြစ်ကြ၏။

တစ္ဆေယင်သည် ရှာဖွေရ အလွယ်ကူဆုံး ဖြစ်သည်။ နေရာတစ်ခုတွင် လူသေများများ ရှိလေ ယင်ဓာတ်များ သိပ်သည်းများပြားလေ ဖြစ်သည်။

လျှို့ဝှက်ဆန်းကြယ်ယင်က ရှာတွေ့ရန် အနည်းငယ် ခက်ခဲသည်။ လျှို့ဝှက်ဆန်းကြယ်ယင်ကို အလွန်အေးသောနေရာများတွင်သာ ရှာတွင်နိုင်သည်။

မြေကြီးယင်က ရှာတွေ့ရန် အလွန်ခက်ခဲပြီး ကံကောင်းရန်လည်း လိုအပ်သည်။ မြေကြီးယင်က ကမ္ဘာမြေကြီး၏အလွန်နက်သော နေရာတွင်သာ ရှိ၏။

ကောင်းကင်ယင်ကတော့ ရှာတွေ့ဖို့ မဖြစ်နိုင်သည့်အရာတစ်ခု ဖြစ်သည်။ ကောင်းကင်ယင်ဖြစ်လာရန်အတွက် နေရာတစ်ခုတွင် တစ္ဆေယင်၊ လျှို့ဝှက်ဆန်းကြယ်ယင်၊ မြေကြီးယင် သုံးခုစလုံး တစ်ချိန်တည်းတွင် ဖြစ်ပေါ်လာရန် လိုအပ်သည်။ ယင်၃မျိုး အတူဖြစ်ပေါ်လာသည့်အချိန်တွင် ထိုယင်၃မျိုးက ကောင်းကင်ယင်အဖြစ်သို့ ပြောင်းလဲသွား၏။

ယင်ဒြပ်စင်၏အရည်အသွေးကောင်းလေလေ ကျင့်ကြံသူများအတွက် ပိုပြီး အကျိုးရှိလေ ဖြစ်သည်။

ဝမ်လင်းက ချက်ချင်း ညာလက်ဖြင့် အစီအရင်တစ်ခုကို ဖန်တီးပြီး လင်္ကာတစ်ခုကို ရွတ်လိုက်သည်။ ရုတ်တရက် အနီရောင်အလင်းမှုန်လေးတစ်ခု သူ့ရှေ့တွင် ပေါ်လာပြီး တဖြည်းဖြည်းနှင့် အနီရောင်အလင်းလုံးတစ်ခု ဖြစ်သွား၏။

ဤနည်းစနစ်က ယင်ဒြပ်စင်အရည်အသွေးကို စမ်းသပ်ရန် ဖြစ်သည်။ အလင်းရောင်၏အရောင်ပေါ် မူတည်ပြီး ယင်အမျိုးအစားကို ခွဲခြားနိုင်သည်။ အလင်းလုံးသည် ခရမ်းရောင်၊ အနက်ရောင်၊ ငွေရောင်၊ အနီရောင်သို့ ပြောင်းသွားလျှင် ကောင်းကင်ယင်၊ မြေကြီးယင်၊ လျှို့ဝှက်ဆန်းကြယ်ယင်၊ တစ္ဆေယင်ဟု အသီးသီး သတ်မှတ်နိုင်သည်။

ယင်အမျိုးအစားတစ်ခုတည်းတွင် ယင်အရည်အသွေးကို သာမန်ယင်၊ ကောင်းမွန်ယင်၊ သိပ်သည်းယင်၊ ပြင်းထန်ယင်ဟု ၄မျိုးခွဲခြားထား၏။

ယင်အရည်အသွေးတစ်ခုချင်းစီတွင်လည်း အဆင့်၁၀ဆင့် ရှိ၏။

သာမန်အားဖြင့် သာမန်အဆင့်၃ယင်ဒြပ်စင်က တစ္ဆေလောကပျံတက်ခြင်းနည်းစနစ်ကို လေ့ကျင့်ရန် လုံလောက်သည်။ သာမန်အဆင့်၈ ယင်ဒြပ်စင်ဆိုလျှင်တော့ ကျင့်စဉ်တိုးတက်နှုန်းကို မြန်စေရန်အတွက် လုံလောက်၏။

အနီရောင်အလင်းလုံးက တဖြည်းဖြည်းတောက်ပလာပြီး နောက်ဆုံးတွင် ၅ကြိမ်တောက်ပပြီး ရပ်တန့်သွား၏။

ဝမ်လင်းက မေးစေ့ကို ပွတ်ပြီး စဉ်းစားလိုက်သည်။ ၅ကြိမ်တောက်ပခြင်းက သာမန်အဆင့်၅ယင်ဒြပ်စင်ရှိသည်ဟု ဆိုလိုခြင်း ဖြစ်သည်။

အနည်းငယ်စဉ်းစားပြီးနောက် သူက အပျက်အစီးများ၏အလယ်သို့ လျှောက်သွားလိုက်သည်။ ပတ်ဝန်းကျင်မှ ယင်စွမ်းအင်များကလည်း အလယ်နှင့်နီးလာသည်နှင့် ပိုမိုသိပ်သည်းလာ၏။ ယင်စွမ်းအင်များကြားတွင် လမ်းလျှော်ရခြင်းက ဝမ်လင်းကို ရေအောက်တွင် လမ်းလျှောက်နေရသကဲ့သို့ ခံစားရစေသည်။ ခြေလှမ်းရာကျော်လှမ်းပြီးသည့်နောက်တွင် အသက်ရှူမဝတော့သကဲ့သို့ ခံစားလာရ၏။

ထိုအချိန်တွင် အလင်းလုံးကလည်း ၈ကြိမ်တောက်ပပြီး ဖြစ်သည်။

ဝမ်လင်းက မရပ်ဘဲ နောက်ထပ်ဆက်သွားပြီး အလင်းတိုင်ထုတ်လွှတ်သောကျောက်တုံးကြီး၏ရှေ့ရောက်မှ ရပ်လိုက်၏။ ရှေ့ဆက်ပြီးလည်း သွားလို့မရတော့ပေ။ အဘယ်ကြောင့်ဆိုသော် ယင်စွမ်းအင်များက သူ့ကိုယ်ထဲသို့ ဝင်ရောက်လာသည့်အတွက် သွေးကြောများက နာကျင်လာပြီး ကိုယ်ထဲမှ စိတ်စွမ်းအင်များကိုပါ မထိန်းချုပ်လာနိုင်တော့၍ ဖြစ်သည်။

အနီရောင်အလင်းလုံးကလည်း တစ်ခုမှ နှစ်ခုအဖြစ်သို့ ကွဲထွက်သွားသည်။ ထိုအရာကို မြင်ပြီး ဝမ်လင်းလည်း ပျော်ရွင်သွား၏။ ဤနေရာသည်‌ ကောင်းမွန်အဆင့်၁ ယင်ဒြပ်စင်ရှိသည့်နေရာ ဖြစ်သည်။

“ဒီနေရာက တစ္ဆေလောကပျံတက်ခြင်းနည်းစနစ်ကို လေ့ကျင့်ဖို့အတွက် အကောင်းဆုံးပဲ… “

ထို့နောက် ဝမ်လင်းက သာမန်အဆင့်၅ ယင်ဒြပ်စင်ရှိသည့်နေရာထိ နောက်သို့ ပြန်ဆုတ်သွား၏။

သည်နေရာက သူ့ခန္ဓာကိုယ်နှင့် ကျင့်ကြံရန်အတွက် အသင့်တော်ဆုံးနေရာတစ်ခု ဖြစ်သည်။ တစ္ဆေလောကပျံတက်ခြင်းနည်းစနစ်အတွက် ယင်သိပ်သည်းမှုက တဖြည်းဖြည်းများလာရမည်ဟု စစ်ထူနန်က အိပ်ပျော်မသွားခင် သူ့ကို ပြောခဲ့၏။

ဝမ်လင်းက အနည်းငယ် စဉ်းစားလိုက်ပြီးနောက် ထိုင်ချကာ မျက်လုံးကို မှိတ်ပြီး စတင်ကျင့်ကြံလိုက်သည်။ သူ့စိတ်ထဲတွင် စစ်ထူနန်၏သင်ကြားပိုချများက ပဲ့တင်ထပ်နေသည်။

တစ္ဆေလောကပျံတက်ခြင်းနည်းလမ်းကို အလွှာ၉လွှာ ခွဲခြားထားသည်။ အလွှာ၃လွှာတိုင်းမှာ အေးခဲအမြုတေတစ်ခုကို ဖြစ်ပေါ်စေသည်။ အလွှာ၉ခုစလုံး ပြီးဆုံးအောင်မြင်သွားတဲ့အခါ အေးခဲအမြုတေ၃ခုက ပေါင်းစပ်သွားပြီး အမြုတေဖွဲ့တည်းခြင်အဆင့်ကို ချက်ချင်ရောက်သွားစေနိုင်သည့် သေချာသည့်အခွင့်အရေးတစ်ခု ဖြစ်လာသည်။

ထိုအချက်သည် ဝမ်လင်း တစ္ဆေလောကပျံတက်ခြင်းကျင့်စဉ်ကို ကျင့်ရခြင်း၏အဓိကရည်ရွယ်ချက် ဖြစ်သည်။ စစ်ထူနန်ကလည်း ဒီကျင့်စဉ်ကို ဝမ်လင်းအား သင်ပေးရခြင်းမှာ အဆင့်တက်ရန် အလွန်လျင်မြန်သောကြောင့် ဖြစ်၏။

တစ်ကယ်တော့ တစ္ဆေလောကပျံတက်ခြင်းကျင့်စဉ်ထက် ပိုမြန်သော အမြုတေခိုးယူခြင်းကဲ့သို့ ကျင့်စဉ်များလည်း ရှိသည်။ သို့သော်လည်း ဝမ်လင်း၏ကျင့်စဉ်အဆင့်ဖြင့် အမြုတေဖွဲ့တည်ခြင်းအဆင့် ကျင့်ကြံသူတစ်ယောက်ကို ဖမ်းဆီးရန် မဖြစ်နိုင်ပါချေ။

အေးခဲအမြုတေသည် ချီသွေးကြောများ နိုးထလာမှုပေါ် မူတည်သည်။ ချီသွေးကြောများနိုးထခြင်းသော့ချက် ၃ခု ရှိသည်။ ၎င်းတို့မှာ တန်းထျန်း၊ချီပင်လယ်၊ဘိုးဘေးချီသွေးကြောတို့ ဖြစ်သည်။

၃မျိုးထဲမှ တစ်မျိုးနိုးထလာသည်နှင့် အေးခဲအမြုတေတစ်ခု ဖြစ်ပေါ်လာလိမ့်ပေလိမ့်မည်။ အေးခဲအမြုတေဖြစ်ပေါ်လာသည်နှင့် ခန္ဓာကိုယ်ထဲရှိ စိတ်စွမ်းအင်များကလည်း အေးစက်လာလိမ့်မည်။

ချီသွေးကြောများ နိုးထရန် အောင်မြင်နှုန်းက လေ့ကျင့်သည့် ယင်အရည်အသွေးနှင့် သက်ဆိုင်နေသည်။

အချိန်တွေက လျင်မြန်စွာ ကုန်ဆုံးလာ၏။ ဝမ်လင်းမျက်လုံးကို ဖွင့်ကြည့်လိုက်ရာ အလင်းရောင်က စတင်ထွက်ပေါ်လာနေပြီး ယင်စွမ်းအင်များက လျင်မြန်စွာ ပျောက်ကွယ်နေသည်ကို တွေ့လိုက်ရသည်။ နေထွက်လာသည်နှင့်တစ်ပြိုင်နက် ယင်စွမ်းအင်အားလုံကလည်း ပျောက်ကွယ်သွား၏။

ဝမ်လင်းသည် မတ်တပ်ထရပ်လိုက်ပြီး ဤနေရာတွင် လေ့ကျင့်ရန် ဆုံးဖြတ်ချက် ချလိုက်၏။ ထို့ကြောင့် နေစရာတစ်ခုတော့ ရှာရပေမည်။ ဘေးပတ်ပတ်လည်ကို လိုက်ကြည့်ပြီးနောက် ပြိုကျနေသောအိမ်တစ်လုံးကို သဘောကျသွားသည်။

ဝမ်လင်း၏လက်တစ်ဖက် ဝေ့ရမ်းလိုက်သည်နှင့် အုတ်ကျိုး၊အုတ်ပဲ့၊ တခြားပစ္စည်းအစအနများက ဘေးဘက်သို့ ရောက်သွားပြီး အနီးအနားတစ်ဝှိုက် ရှင်းလင်းသွား၏။

အကုန်လုံးရှင်းလင်းပြီးနောက် ဝမ်လင်းက ရှင်းလင်းထားသည့်နေရာ၏အလယ်တွင် ထိုင်လိုက်ပြီး ထန်းမိသားစုမြို့က ဝယ်လာသည့်စာအုပ်ကို ထုတ်ပြီး ဂရုတစိုက် ဖတ်ကြည့်လိုက်သည်။

စာအုပ်ထဲတွင် ဝင်္ကပါအစီအရင်များအကြောင်း၊ ဝင်္ကပါအစီအရင် ပြုလုပ်နည်းများ၊ ဝင်္ကပါအစီအရင် ထိန်းချုပ်နည်းများအကြောင်းကို ရှင်းလင်းစွာဖော်ပြထား၏။

စာအုပ်ထဲမှ အကြောင်းအရာများကို မှတ်သားလိုက်ပြီးနောက် အနည်းငယ် စဉ်းစားလိုက်သည်။ လက်ကလည်း ဆက်တိုက်ဆိုသလိုပင် လေထဲတွင် တစ်ခုခုကို ဆွဲနေသကဲ့သို့ လှုပ်ရှားနေသည်။

နေ့အချိန်က လျင်မြန်စွာ ကုန်ဆုံးသွားပြီး နေဝင်ဆည်းဆာအချိန်ကို ရောက်ရှိလာမှ ဝမ်လင်း၏မျက်လုံးပွင့်လာပြီး သက်ပြင်းချလိုက်၏။ သူ ရေရွတ်လိုက်သည်… “ဝင်္ကပါအစီအရင်တွေက အရမ်းနက်နဲပြီး ရှုပ်ထွေးတာပဲ… ဒီစာအုပ်ကို တစ်နေ့လုံးလေ့လာတာတောင် နည်းနည်းပဲ နားလည်သေးတယ်… ဒါတောင် ဒီစာအုပ်က အခြေခံတွေပဲ ရေးထားတာမို့လို့ပေါ့… စာအုပ်ထဲက ပုံရိပ်ယောင်ဝင်္ကပါအစီအရင်က အရမ်းကို ရှုပ်ထွေးလွန်းတယ်… ဒီဝင်္ကပါအစီအရင်က ခန့်မှန်းခြင်းအပေါ် မူတည်းတယ်… များများ ခန့်မှန်းနိုင်လေ ဝင်္ကပါက ပိုပြီး အစွမ်းထက်လေပဲ… “

ဝမ်လင်းက အတွေးများကို ရပ်တန့်ပစ်လိုက်ပြီး ချက်ချင်း ကြိုးစားလိုက်သည်။ သူက အခန်းအပြင်ဘက်တွင် ဆွဲငင်အားနည်းစနစ်ဖြင့် ကျောက်တုံးများကို ရွေ့ထားလိုက်၏။

စာအုပ်ထဲမှအတိုင်း ဂရုတစိုက်ဖြင့် လိုက်လုပ်ပြီး အရိုးရှင်းဆုံး ဝင်္ကပါအစီအရင်ဖြစ်သည့် စိတ်ထွေပြားဝင်္ကပါအသေးကို ပြုလုပ်လိုက်သည်။

ဤဝင်္ကပါအစီအရင်က ဝင်္ကပါအစီအရင်အလံများကို မလိုအပ်သည်အထိ အရမ်းကို ရိုးရှင်းလွန်း၏။ ဝမ်လင်းက ခါးသက်စွာ ပြုံးလိုက်ပြီး ကျောက်တုံးများကို ကြည့်ကာ စာအုပ်ကို ပြန်ကြည့်လိုက်သည်။ ထို့နောက် ဝမ်လင်းက အနည်းငယ် ပြင်ဆင်လိုက်ပြီးမှ စာအုပ်ထဲမှ ဝင်္ကပါနဲ့ တူသွား၏။

သူက အသက်ကို ဝအောင် ရှူပြီး အမိန့်ပေးအစီအရင်ကို လက်ဖြင့် ဖန်တီးလိုက်သည်။ ထို့နောက် မြူများ ပေါ်ထွက်လာပြီး နေရာတစ်ခုလုံးကို ဖုံးအုပ်သွား၏။

ဝမ်လင်းက မြူများကို ကြည့်ပြီး ခါးသက်စွာ ပြုံးလိုက်သည်။ ဒီဝင်္ကပါအစီအရင်က သာမန်သေမျိုးများကိုသာ အရူးလုပ်၍ ရနိုင်သော်လည်း ကျင့်ကြံသူများကိုတော့ လုပ်၍ မရနိုင်ပေ။ ထို့ကြောင် ဤဝင်္ကပါက သူ လေ့ကျင့်နေစဉ် ကာကွယ်ပေးနိုင်လိမ့်မည် မဟုတ်ချေ။

ဝမ်လင်းက အနည်းငယ် စဉ်းစားပြီးနောက် ရေရွတ်လိုက်သည်… “တစ်ခုနဲ့ မလုံလောက်ရင် နှစ်ခုထားမယ်… အဲ့တာမှ မလုံလောက်ရင် စာအုပ်ထဲက ဝင်္ကပါအစီအရင်တွေအကုန် ချထားလိုက်မယ်… ဒါဆိုရင်တော့ အကျိုးသက်ရောက်မှုတစ်ခုခုတော့ ရှိလိမ့်မယ်… “

ထိုသို့ တွေးပြီး ဝမ်လင်းက နောက်ထပ်ကျောက်တုံးများကို ရွေ့လာပြီး ဝင်္ကပါအနည်းငယ်ကို ထပ်ချလိုက်သည်။ သည်လိုနှင့် ညအချိန်ကို ရောက်ရှိလာသည်။

ဝမ်လင်းက မြေပြင်ပေါ်တွင် ခြေချိတ်ထိုင်လိုက်ပြီး မကြာမီ ယင်စွမ်းအင်များ ထွက်ပေါ်လာ၏။ ဝမ်လင်းက အသက်ကို ဝအောင်ရှုလိုက်ပြီး လက်ကို ဒူးခေါင်းပေါ်သို့ တင်လိုက်ကာ စတင်ကျင့်ကြံလေသည်။ သူလေ့ကျင့်နေသည့်အသက်ရှူနည်းစနစ်က ငါးဆင့်ရှိုက် အသက်ရှူနည်းစနစ်ဖြစ်သည်။

ထိုအသက်ရှူနည်းသည် လေကို ပြန်ထုတ်သည့်အခါ ကြာချိန်သည် လေကိုရှူသွင်းလိုက်ချိန်၏ ၅ပုံ၁ပုံခန့်သာ ကြာမြင်၏။ ထို့ကြောင့် ဤနည်းစနစ်သည် ယင်စွမ်းအင်များကို စုပ်ယူရန် အမြန်ဆုံးနည်းစနစ်ဖြစ်သည်။

ယခုအခါတွင် ဝမ်လင်းသည် အပြင်ဘက်မှ စွမ်းအင်များကို ပထမဆုံးအကြိမ် စုပ်ယူပြီး ကျင့်ကြံခြင်း ဖြစ်သည်။ လွန်ခဲ့သည့်၂နှစ်လုံးလုံး ကောင်းကင်ဘုံဆန့်ကျင်ခြင်းပုတီးစေ့အထဲတွင် စိတ်ဝိညာဉ်ရေများကို အသုံးပြုပြီး ကျင့်ကြံနေခဲ့၏။

ယင်စွမ်းအင်သည် အခြေခံအားဖြင့် စိတ်စွမ်းအင်နှင့် တူညီသည်။ ဝမ်လင်းသည် ကျင့်ကြံခြင်းလမ်းပေါ်ရောက်ရှိနေသည်မှာ နှစ်ပေါင်းများစွာ ကြာမြင့်နေပြီ ဖြစ်သည်။ ထို့ကြောင့် ယင်စွမ်းအင်များကို စုပ်ယူလိုက်သည်နှင့် ကွာခြားမှုကို ချက်ချင်း သတိပြုမိ၏။ စိတ်စွမ်းအင်များကို စုပ်ယူသည့်အခါ စိတ်စွမ်းအင်းများကို ခန္ဓာကိုယ်ထဲသို့ စုပ်ယူနိုင်ခြင်းမှ ကာကွယ်ထားသည့်အလွှာပါးတစ်ခုက အမြဲတမ်းရှိနေသည်။ ထို့ကြောင့် သူ စုပ်ယူခဲ့သော စိတ်စွမ်းအင်ပမာဏ အများအပြားသည် ပျောက်ကွယ်သွားရ၏။

သို့သော်လည်း ယခုတစ်ကြိမ်တွင် ယင်စွမ်းအင်များကို စုပ်ယူခြင်းမှ တားဆီးပေးသည့် အလွှာပါး မရှိသည့်အတွက် သူ့ကိုယ်ထဲသို့ ယင်စွမ်းအင်များက အလွန်မြန်ဆန်သည့်နှုန်းဖြင့် ဝင်ရောက်နေသည်။ သူ့ကိုယ်ထဲသို့ ဝင်ရောက်လာသော ယင်စွမ်းအင်များကိုလည်း ယခင်ကနှင့် မတူစွာ အပြည့်အဝ စုပ်ယူနိုင်၏။

ဝမ်လင်းက ထိုအကြောင်းကို အနည်းငယ် စဉ်းစားပြီးနောက် အဖြေ၃ခု ရလာသည်။ ပထမတစ်ခုက ယင်စွမ်းအင်သည် စိတ်စွမ်းအင်များနှင့် ကွာခြားပြီး သူ့အတွက် ကျင့်ကြံရန် ပိုသင့်တော်ခြင်း ဖြစ်နိုင်သည်။ ဒုတိယတစ်ခုက ခန္ဓာကိုယ်သန့်စင်ခြင်းအဆင့်ကျင့်ကြံသူက ချီစုစည်းခြင်းအဆင့်မှ ကျင့်ကြံသူထက် စုပ်ယူနိုင်စွမ်း မြင့်မားခြင်းကြောင့် ဖြစ်နိုင်သည်။ တတိယတစ်ခုက သူစုပ်ယူခဲ့သော ထန်းလီ၏စိတ်ဝိညာဉ်အရင်းအမြစ်ကြောင့် သူ၏ပင်ကိုယ်စွမ်းရည်လည်း တိုးတက်လာခြင်း ဖြစ်နိုင်သည်။

အဖြေက ဘယ်ဟာမှန်မှန် ဝမ်လင်းက နောက်ထပ်စဉ်းစားမနေဘဲ ကျင့်ကြံခြင်းတွင်သာ အာရုံစိုက်ထားလိုက်၏။

အစပိုင်းတွင် ယင်စွမ်းအင်များ၏ အေးစက်သောသဘာဝကြောင့် ဝမ်လင်းက သက်တောင့်သက်သာ မဖြစ်ပေ။ ယင်စွမ်းအင်များကို စုပ်ယူပြီးနောက် ယင်စွမ်းအင်များက သူ၏ခန္ဓာကိုယ်အင်္ဂါများဆီသို့ ဖြတ်စီးဆင်းသွား၏။ သူ့ခန္ဓာကိုယ်အတွင်းမှ ထွက်ပေါ်လာသော အအေးဓာတ်များက သူ့ကို ခိုက်ခိုက်တုန်သွားစေသည်။ ထိုအချက်က စိတ်စွမ်းအင်များကို စုပ်ယူသည့်အခါနှင့် လုံးဝမတူသည့်အခြေအနေတစ်ခု ဖြစ်သည်။ တစ်ခုက သူ့ခန္ဓာကိုယ်ကို နွေးထွေးပြီး သက်တောင့်သက်သာဖြစ်စေသည်။ တစ်ခုကတော့ သူ့ခန္ဓာကိုယ်ကို အေးခဲမတတ် ခံစားရစေသည်။

ဝမ်လင်းက ယင်စွမ်းအင်များကို ဆက်လက် စုပ်ယူနေသည်။ သူ့ခြေလက်များက အေးစက်လာပြီး သူ၏သွေးများက ပြစ်ခဲလာကာ နှလုံးခုန်နှုန်းတောင်မှ နှေးကွေးလာ၏။

သူ၏မျက်ခုံး၊ဆံပင်နှင့် တစ်ကိုယ်လုံးမှ မွေးညှင်းပေါက်အားလုံးတွင် ဆီးနှင်းများ စတင် ဖြစ်ပေါ်လာသည်။ ခန္ဓာကိုယ်တွင်မှ အအေးဓာတ်မြင့်တက်လာမှုက ပတ်ဝန်းကျင်ကိုပါ ကူးစက်သွား၏။

အချိန်ကလည်း တဖြည်းဖြည်း ကုန်ဆုံးလာကာ ယင်စွမ်းအင်များကလည်း ပျောက်ကွယ်သွားသည်။ ထိုအခါ ဝမ်လင်း၏မျက်ခွံများက လှုပ်လာပြီး မျက်လုံးကို ဖွင့်လိုက်၏။ တစ်ညလုံး လေ့ကျင့်ပြီးနောက် သူ၏တန်းထျန်းထဲတွင် သေးငယ်သောယင်စွမ်းအင်အစုအဝေးလေးတစ်ခုလည်း ပေါ်လာသည်။ ယင်စွမ်းအင်အစုအဝေးလေးက နှေးကွေးစွာ လည်ပတ်လျက် ရှိနေပြီး ယင်စွမ်းအင်များကို ထုတ်လွှတ်နေ၏။

သူ့ကိုယ်ထဲမှ စိတ်စွမ်းအင်များက ယင်စွမ်းအင်များကို ဆန့်ကျင်ခြင်း မပြုဘဲ တစ်ဖက်နှင့်တစ်ဖက် လျစ်လျူရှူထားသကဲ့သို့ ဖြစ်နေသည်။

နှောင်ဖွဲ့ခြင်းကင်း တန်ခိုးရှင်

ဘာသာပြန် ... Oo Zaw

အပိုင်း (၈၈) ထူးဆန်းသော အပြာရောင်အသားအရေနှင့်လူ

ဝမ်လင်းက ဝမ်းဗိုက်ကို စမ်းကြည့်ပြီး ရေရွတ်လိုက်သည်… “ဘာကြောင့် တစ္ဆေလောပျံတက်ခြင်းလို့ခေါ်လဲဆိုတာက ငါသိပြီ… “

တစ္ဆေလောကပျံတက်ခြင်းကျင့်စဉ်က ကျင့်ကြံနေချိန်တွင် လူကို သေခြင်းနှင့် နီးကပ်နေစေသည်။ ထိုအခြေအနေတွင် ခန္ဓာကိုယ်က ယင်စွမ်းအင်များကို အလွယ်တကူ စုပ်ယူနိုင်သော်လည်း အမှားတစ်စုံတစ်ရာ လုပ်မိပါက တစ်ခါတည်း တစ္ဆေလောကကို ရောက်သွားပေလိမ့်မည်။

အမှန်တစ်ကယ်တွင် အဆင့်၆နိုင်ငံအတွင်း၌ တစ္ဆေလောကပျံတက်ခြင်းကျင့်စဉ်ကို လေ့ကျင့်ရဲသည့်လူ အများကြီး မရှိပေ။ စစ်ထူနန်က ထိုကျင့်စဉ်ကို အောင်မြင်ခဲ့သောလူအနည်းငယ်ထဲမှ တစ်ယောက်ဖြစ်သည်။ အဆင့်၆နိုင်ငံများမှ မိစ္ဆာဂိုဏ်းသားများအားလုံးကြားထဲတွင် တစ္ဆေလောကပျံတက်ခြင်းကျင့်စဉ်သည် ထူးဆန်းသောကျင့်စဉ်တစ်ခုအဖြစ် တည်ရှိနေသည်။

အဘယ်ကြောင့်ဆိုသော် ပြောင်းလဲမှုက အလွန်အမင်း ကွာခြားသောကြောင့် ဖြစ်သည်။ တချို့က ကျင့်ကြံခြင်းတွင် အကျိုးဖြစ်ထွန်းသွားကြသော်လည်း တချို့ကတော့ သေဆုံးသွားကြရသည်။

ဝမ်လင်းက ပျက်စီးနေသာ မြို့ပျက်ကြီးထဲတွင် နေထိုင်ခဲ့၏။ ညတိုင်း ယင်စွမ်းအင်ကို စုပ်ယူပြီး ကျင့်ကြံလာသည်မျာ တစ်လ ကုန်ဆုံးသွားပြီး ဖြစ်သည်။

တစ်လအတွင်းတွင် တစ္ဆေလောကပျံတက်ခြင်းကျင့်စဉ်ကို လေ့ကျင့်ခြင်းအပြင် ကောင်းကင်ဘုံဆန့်ကျင်ခြင်းပုတီးစေ့၏ ပြောင်းလဲမှုများကို တွေ့ရှိလိုက်ရ၏။ ပုတီးစေ့မှ ထုတ်ပေးလိုက်သော စိတ်ဝိညာဉ်ရေများတွင် စိတ်စွမ်းအင်များ ပါမလာတော့ဘဲ ယင်စွမ်းအင်များ ပါဝင်လာခြင်း ဖြစ်သည်။

ထိုအကြောင်းကို သိသွားသည့်အချိန်မှစ၍ ယင်စိတ်ဝိညာဉ်ရေများကို စတင်စုဆောင်းတော့သည်။ ယင်စိတ်ဝိညာဉ်ရေများကို ညသန်းခေါင်အချိန်တွင် ထုတ်ပေး၏။

ယင်စိတ်ဝိညာဉ်ရေက စိတ်စွမ်းအင်ပါသည့် သာမန်စိတ်ဝိညာဉ်ရေနှင့် ယှဉ်လိုက်လျှင် ယင်စွမ်းအင်ပမာဏအများကြီး ပါဝင်နေသည်။

တစ္ဆေလောကပျံတက်ခြင်းကျင့်စဉ်သည် လူတစ်ယောက်၏ ယင်စွမ်းအင်စုပ်ယူနှုန်းနှင့် အများကြီး သက်ဆိုင်နေသည်။ များများစုပ်ယူနိုင်ပါက ပိုပြီးစွမ်းအားကြီးလာမည် ဖြစ်သည်။ နောက်ဆုံးတွင် ဝမ်လင်းက ညအချိန်တွင် အပြင်ဘက်၌ လေ့ကျင့်ပြီး နေ့အချိန်တွင် အိမ်မက်နယ်မြေထဲသို့ ဝင်ရောက်ပြီး ယင်စိတ်ဝိညာဉ်ရေများကို အသုံးပြု၍ လေ့ကျင့်၏။

အချိန်များ တစ်ရက်ပြီးတစ်ရက် ကုန်ဆုံးလာသည်နှင့်အမျှ ဝမ်လင်းက ယင်စွမ်းအင်များကို ပိုမို စုပ်ယူလာနိုင်သည်။ ယခုဆိုလျှင် လေ့ကျင့်နေသည့်အချိန်တိုင်းတွင် သူ့ကိုယ်ထဲမှ ယင်စွမ်းအင်များက ပတ်ဝန်းကျင်နှင့် သဟဇာတဖြစ်လာပြီး အသက်ရှူနှုန်းကလည်း မခုန်တော့သည်ဟု ထင်ရလောက်အောင်အထိ နှေးကွေးသွား၏။

မနက်ခင်းတစ်ခုတွင် ဝမ်လင်းက မျက်လုံးဖွင့်လိုက်ပြီး သက်ပြင်းချကာ ပြောလိုက်သည်… “ယင်စွမ်းအင်အများကြီးကို ငါ စုပ်ယူပြီးနေပြီ… ဒီအချိန်ဆို ပထမအဆင့်ကို ချိုးဖြတ်သင့်နေပြီ… “

ရုတ်တရက် ဝမ်လင်းက စိတ်ထွေပြားဝင်္ကပါအစီအရင်ကို ဝေခွဲမရသောအကြည့်ဖြင့် ကြည့်လိုက်သည်။ အင်္ကျီလက်အိုးကို လွှဲရမ်းလိုက်ရာ မြူထဲတွင် လျှောက်လမ်းတစ်ခု ပေါ်လာ၏။

ဝမ်လင်းသည် အပြင်ဘက်သို့ ရောက်လာသောအခါ အပျက်အစီးများကြားထဲတွင် မဲမဲအရိပ်များကို တွေ့လိုက်ရသည်။ ထိုအရိပ်များသည် ဒဏ်ရာရထားပြီး အလင်းတိုင်ထွက်ပေါ်လာသည်ကို စောင့်နေကြသည့် သားရဲများ ဖြစ်၏။ သို့သော်လည်း ယခုအချိန်တွင်မူ အားလုံးက သေဆုံးနေလေပြီ။ သူတို့သေဆုံးသွားပုံက တစ်ယောက်ယောက်က အလင်းတိုင်ထွက်ပေါ်သည့်နေရာမှ အပျက်အစီးများကြားထဲသို့ ဆွဲခေါ်သွားခြင်း ခံထားရသည့်ပုံစံမျိုး ဖြစ်သည်။

“ဒီနေရာမှာ လူတွေ ရှိနေသေးတာလား… “ ဝမ်လင်း၏စိတ်ထဲတွင် အတွေးတစ်ခု ဝင်ရောက်လာသည်။

ဝမ်လင်းက ချက်ချင်း သူ့အခန်းပတ်လည်ကို စစ်ဆေးကြည့်လိုက်သည်။ သို့သော်လည်း သူ၏ဝင်္ကပါအစီအရင်ကို တိုက်ခိုက်ထားသည့်လက္ခဏာတစ်ခုမှ ရှိမနေချေ။

သူက မေးစေ့ကို ပွတ်သပ်လိုက်ပြီး တောအုပ်ထဲသို့ ပြေးဝင်သွားကာ သားရဲအသေကောင်၂ကောင်ကို ကိုင်ပြီး တောအုပ်ထဲမှ ပြန်ထွက်လာ၏။ သားရဲအသေကောင်၂ကောင်ကို ဘေးတွင် ပစ်ချလိုက်ပြီး ဝင်္ကပါအစီအရင်ထဲသို့ ပြန်ဝင်နေလိုက်သည်။ ထို့နောက် ဝင်္ကပါအစီအရင်အားလုံးကို အသက်သွင်းလိုက်ရာ မြူများက ပိုပြီး ထူထပ်လာ၏။

ထို့နောက် ဝမ်လင်းက တည်ငြိမ်စွာဖြင့် ထိုင်ချလိုက်ပြီး နတ်ဘုရားစိတ်အာရုံကို ဖြန့်ကျက်ထားလိုက်သည်။ ယင်စိတ်ဝိညာဉ်ရေများကို သောက်လိုက်ပြီး သတိဝီရိယရှိရှိဖြင့် ပတ်ဝန်းကျင်ကို စောင့်ကြည့်ပြီး ကျင့်စဉ်ကျင့်နေလိုက်၏။

ညအချိန်သို့ ပြန်ရောက်လာ၏။ ဒီညတွင်တော့ ဝမ်လင်းက ယင်စွမ်းအင်များကို မစုပ်ယူတော့ဘဲ ပတ်ဝန်းကျင်ကိုသာ အာရုံစိုက်ထားလိုက်တော့သည်။ နတ်ဘုရားစိတ်အာရုံကိုလည်း အဝေးဆုံးရောက်နိုင်တဲ့နေရာအထိ ဖြန့်ကျက်ထား၏။

သားရဲအသေကောင်၂ကောင်ကိုလည်း အာရုံစိုက်ထားသေး၏။ ဒီလိုအပျက်အစီးတွေပဲ ရှိတဲ့နေရာတစ်ခုမှာ ဘယ်လိုသက်ရှိမျိုး နေထိုင်ပြီး ညအချိန်မှ ထွက်လာရသလဲ သူ အလွန်သိချင်နေသည်။

တဖြည်းဖြည်းနှင့် ညသန်းခေါင်ယံအချိန်သို့ပင် ရောက်တော့မည် ဖြစ်ပြီး ယင်စွမ်းအင်များကလည်း အလွန်သိပ်သည်းနေသည့်အချိန် ဖြစ်သည်။

သူ့၏နတ်ဘုရားစိတ်အာရုံဖြန့်ကျက်ထားသည့် အကွာအဝေးတစ်ဝှိုက်တွင် အားလုံးက တိတ်ဆိတ်ငြိမ်သက်နေ၏။ အပျက်အစီးများအပြင်ဘက်ရှိ တောအုပ်တစ်ခုလုံးကလည်း ကြောက်စရာကောင်းလောက်အောင် တိတ်ဆိတ်နေ၏။

အရင်ရက်များကလည်း နတ်ဘုရားစိတ်အာရုံကို ဖြန့်ကျက်ဖူးသည်။ သို့သော်လည်း ယခင်ရက်များက တောအုပ်အတွင်းမှ သားရဲအော်သံများကို တစ်ခါတစ်ရံ ကြားရသေး၏။ ယခုမူ ဘာကိုမှမကြားရဘဲ တိတ်ဆိတ်နေခြင်းက ပထမဆုံးအကြိမ်ဖြစ်သည်။

ရုတ်တရက် ဝမ်လင်း၏အမူအရာက ပြောင်းလဲသွားပြီး အပျက်အစီးများကြားထဲသို့ စိုက်ကြည့်လိုက်၏။

ယင်စွမ်းအင်များပြည့်နေသော အပျက်အစီးများကြားထဲတွင် ပုံရိပ်တစ်ခုက လျင်မြန်စွာ ပေါ်ထွက်လာသည်။ ထိုပုံရိပ်၏အလျင်က မြန်ဆန်လွန်းလှ၏။ ဝမ်လင်းက နတ်ဘုရားစိတ်အာရုံကို ဖြန့်ကျက်ထားတာတောင်မှ သူ့ရှေ့မှ သားရဲအသေနှစ်ကောင် ပျောက်ကွယ်သွားသည်ကို အရိပ်သာ မြင်လိုက်ရ၏။

ဝမ်လင်း တုန်လှုပ်နေသည်။ ထိုပုံရိပ် ထွက်ပေါ်ချိန်တုန်းက ဝမ်လင်းက မည်သည့်ပုံသဏ္ဍာန်ဖြစ်သည်ကို မြင်လိုက်ရသည်။ အပြာရောင်အသားအရေနှင့်လူပုံစံ သက်ရှိတစ်ကောင် ဖြစ်သည်။

ထိုလူ၏အရေပြားကို ထူးဆန်းသောသင်္ကေတများဖြင့်လည်း ဖုံးအုပ်ထား၏။ ထို့အပြင် လက်မဝက်အရွယ်အစားရှိသော အဝါရောင်စက္ကူ၉ရွက်ကလည်း ခန္ဓာကိုယ်၏အစိတ်အပိုင်းများတွင် ရှိနေ၏။

ထိုထူးဆန်းသောလူက နောက်တစ်ကြိမ် ထွက်ပေါ်လာပြန်သည်။ သူက ဝမ်လင်း၏ဝင်္ကပါအစီအရင်အပြင်ဘက်တွင် တစ်ခုခုကို တွေးနေဟန်ဖြင့် မတ်တပ်ရပ်နေ၏။

ထူးဆန်းသောလူက နောက်သို့ ခြေလှမ်းအနည်းငယ် ဆုတ်လိုက်ပြီး မြူများကို စိုက်ကြည့်လိုက်၏။ သူက အနည်းငယ် တုန့်ဆိုင်းနေပြီးနောက် မြူများကို တစ်ပတ် ပတ်ကြည့်လိုက်သည်။

ဝမ်လင်းက သူ၏စိတ်ကို ထူးဆန်သောလူထံ၌သာ အာရုံစိုက်ထားလိုက်၏။ ထိုထူးဆန်းသောလူက မည်သို့လုပ်မည်ကို သူ သိချင်နေသည်။

ထူးဆန်းသောလူက ဝင်္ကပါအစီအရင်ကို လှည့်ပတ်ကြည့်ပြီးနောက် သိချင်စိတ်ပြင်းပြလာသည့်ဟန်ဖြင့် ဝင်္ကပါအစီအရင်အတွင်းသို့ ပြေးဝင်လိုက်၏။

ဝင်္ကပါထဲသို့ ဝင်လာသည်နှင့် ဝမ်လင်း၏မျက်လုံးထဲတွင် သတ်ဖြတ်ချင်စိတ်များဖြင့် ပြည့်နှက်လာသည်။ သူ့ညာလက်ကလည်း အစီအရင်တစ်ခုကို ပြုလုပ်ပြီး အဖြူရောင်အလင်းတစ်ခုကို ဝင်္ကပါအစီအရင်ထဲသို့ ပစ်လိုက်၏။ ထိုအခါ မြူများက ဆူပွက်လာသကဲ့သို့ လျင်မြန်စွာ လှုပ်ရှားလာ၏။

မကြာမီ ကျောက်တုံးများ ကွဲကြေသံများ ထွက်ပေါ်လာပြီး ဝင်္ကပါများ တစ်ခုပြီးတစ်ခု ပျက်စီးလာသည်။ မြူများ၏သိပ်သည်းမှုကလည်း လျော့ကျလာ၏။

ဝမ်လင်းက ပါးစပ်ကို ဟပြီး အစိမ်းရောင်ဓားကို ထုတ်ကာ ထူးဆန်းသောလူဆီသို့ ပစ်လိုက်၏။ ‘ဘုန်း’ ဆိုသောအသံနှင့်အတူ ဓားက ထူးဆန်းသောလူကို ထိသွားပြီး ဒေါသတကြီးအော်ဟစ်သံတစ်ခု ထွက်ပေါ်လာသည်။ ထို့နောက် ပြင်းထန်သောအားတစ်ခု ထွက်ပေါ်လာပြီး တောက်ပနေသောကျောက်တုံးများက လေထဲသို့ မြောက်တက်သွားပြီး အမှုန့်ဖြစ်သွား၏။

မြူများပျောက်ကွယ်သွားသည်နှင့် သူက ဝမ်လင်းကို ကြည့်လိုက်ပြီး ဝမ်လင်းထံသို့ နီရဲနေသော မျက်လုံးများ ဖြင့် လျှောက်လာ၏။

ဝမ်လင်း၏အမူအရာက တည်ငြိမ်နေပြီး လေထဲသို့ လက်ကို ဝေ့ရမ်းလိုက်ရာ ထူးဆန်းသောလူ၏နောက်တွင် အစိမ်းရောင်ဓားက ပေါ်လာသည်။ ထို့နောက် အစိမ်းရောင်ဓားက ထူးဆန်းသောလူ၏ရင်ဘတ်ကို ဖောက်ထွင်းသွားပြီး အပြာရောင်သွေးများ ဖြာထွက်သွား၏။

သွေးများ ထွက်ပေါ်လာသည်နှင့် သွေးများက ခဲသွားပြီး မြေပြင်ပေါ်သို့ ကျသွားသည်။

ထူးဆန်းသောလူက နာကျင်စွာ အော်ဟစ်လိုက်ပြီး နောက်သို့ ချက်ချင်း ဆုတ်သွား၏။ သူ့မျက်နှာတွင် ကြောက်လန့်နေသည့်အရိပ်ယောင်များ ပေါ်နေသည်။

ဝမ်လင်း မှင်သက်သွားသည်။ ထူးဆန်းသောလူက ဓားနဲ့တိုက်ခိုက်ခံလိုက်ရတာတောင်မှ လှုပ်ရှားနိုင်နေသေး၏။ သူက ချက်ချင်း ဓားအိမ်ကို ထုတ်လိုက်ပြီး လက်ထဲတွင် ကိုင်ထားလိုက်သည်။ ထို့နောက် အစိမ်းရောင်ဓားကို လျင်မြန်စွာဖြင့် ဓားအိမ်ထဲသို့ ဝင်သွားစေလိုက်သည်။ ၅ပုံ၁ပုံခန့်သို့ ရောက်သောအခါ ဓား၏အရောင်က အပြာရောင်သို့ ပြောင်းသွားပြီး အနက်ရောင်သို့ ထပ်ပြောင်းသွားသည်။

ဝမ်လင်းက ဓားကို ဆွဲထုတ်ပြီး ချက်ချင်း ထူးဆန်းသောလူထံသို့ ပစ်လိုက်သည်။

ထူးဆန်းသောလူက အနက်ရောင်ဓားကို ကြည့်ပြီး ကြောက်လန့်နေဟန်ဖြင့် နောက်သို့ ခပ်ဝေးဝေးကို ဆုတ်သွား၏။ သို့သော်လည်း ဓားက သူ၏ရင်ဘတ်ကို ထိုးစိုက်သွားပြီး ပေါက်ကွဲသံများ ဆက်တိုက်ထွက်လာသည်။ ထူးဆန်းသောလူကလည်း အနောက်သို့ ကြိုးပျက်သွားသော စွန်ကဲ့သို့ လွှင့်ထွက်သွား၏။

ဓားပေါ်တွင် ထူးဆန်းသောလူ၏သွေးများ စွန်းထင်သွားပြီး သူ့ခန္ဓာကိုယ်ထဲတွင် ဓားက ညပ်သွား၏။ ဝမ်လင်းက မည်မျှပင် အားစိုက်ထုတ်ပြီး ထွက်လာအောင် စေခိုင်းပါစေ။ ဓားက လှုပ်ပင် မလှုပ်တော့ချေ။ ထို့အပြင် ဓား၏တည်နေရာပြောင်းရွေ့ခြင်းကိုလည်း အသုံးပြု၍ မရတော့ချေ။

ဝမ်လင်း၏မျက်လုံးထဲတွင် သတ်ဖြတ်ချင်စိတ်များက ပိုမို ပြင်းထန်လာသည်။

ဝမ်လင်းက သိုလှောင်အိတ်ထဲမှ ကျန်းဟူပေးခဲ့သော အဝါရောင်အဆောင်ကို ထုတ်ယူလိုက်၏။ ထိုအချိန်တွင် မြေပေါ်သို့ လဲကျသွားသော ထူးဆန်းသောလူ၏ ရင်ဘတ်ဒဏ်ရာမှ အပြာရောင်သွေးများ စီးကျနေသည်။

ထို့အတူ သူ့ခန္ဓာကိုယ်မှ သင်္ကေတများက ရှုပ်ထွေးသွားကာ တောက်ပလာပြီး သူ၏ဒဏ်ရာသည်လည်း လျင်မြန်စွာ ပြန်ကောင်းလာ၏။

ဝမ်လင်းကလည်း စိတ်စွမ်းအင်များကို အဝါရောင်အဆောင်စာရွက်ပေါ်သို့ ထွေးထုတ်လိုက်ရာ အဝါရောင်စာရွက်က ပူပြင်းသော အနက်ရောင်မီးတောက်တစ်ခု ဖြစ်သွားပြီး ထူးဆန်းသောလူ၏ဒဏ်ရာကို ထပ်မံ ထိမှန်သွားသည်။

ထူးဆန်းသောလူ၏ခန္ဓာကိုယ်က နောက်တစ်ကြိမ် ပေါက်ထွက်သွားသဖြင့် နာကျင်စွာ အော်ဟစ်လိုက်၏။

“မသေသေးဘူးလား… “ ဝမ်လင်း အလွန်ကို အံ့အားသင့်နေသည်။ အဆောင်စာရွက်၏တိုက်ခိုက်မှုကြောင့် ဓားက လွတ်လပ်သွားသည့်အတွက် သူ့ဘေးသို့ ပြန်ခေါ်လိုက်သည်။

ထူးဆန်းသောလူက နာကျင်စွာ ခံစားနေရဟန်ဖြင့် ကြိုးစားပြီး သူ့ကိုယ်မှ အဝါရောင်စာရွက်တစ်ခုကို ဆုတ်ဖြဲလိုက်သည်။ စာရွက်ပြဲသွားသည်နှင့်တစ်ပြိုင်နက် သူ၏ခန္ဓာကိုယ်အနှံ့မှ အစိမ်းရောင်အငွေ့များ ထွက်လာပြီး သူ၏တစ်ကိုယ်လုံးကို ဖုံးအုပ်သွား၏။

ဝမ်လင်း၏မျက်နှာက ထူးဆန်းသကဲ့သို့ ဖြစ်နေပြီး တုန့်ဆိုင်းခြင်းမရှိ ဓားကို ဓားအိမ်ထဲသို့ ၅ပုံ၃ပုံအထိ ထိုးသွင်းလိုက်၏။ ဓား၏အရောင်ကလည်း အနက်ရောင်မှ အနီရောင်သို့ ပြောင်းသွား၏။

၅ပုံ၃ပုံသည် ဓားအိမ်ထဲသို့ ထိုးသွင်းနိုင်သော ဝမ်လင်း၏အမြင့်ဆုံးကန့်သတ်ချက်ဖြစ်သည်။ သူ၏ ခန္ဓာကိုယ်သန့်စင်ခြင်းအဆင့်ဖြင့် ဓားအိမ်ထဲသို့ ၅ပုံ၃ပုံသာ ထည့်နိုင်သေး၏။ သို့သော်လည်း ထိုဓားဖြင့် ခန္ဓာကိုယ်သန့်စင်ခြင်းအလယ်အဆင့်ကျင့်ကြံသူများကို ယှဉ်တိုက်နိုင်သည်။

ထိုအချိန်တွင် ထူးဆန်းသောလူကလည်း ထွက်လာသော အစိမ်းရောင်အငွေ့များအားလုံးကို သူ့ကိုယ်မှ ပြန်စုပ်ယူလိုက်၏။ ထို့နောက် သူက ဝမ်လင်း၏ရှေ့သို့ ရောက်လာသည်။ ယခုအချိန်တွင် သူ့ခန္ဓာကိုယ်တွင် မည်သည့်ဒဏ်ရာမှ ရှိမနေတော့ဘဲ အကောင်းအတိုင်း ဖြစ်နေ၏။

သူက ဝမ်လင်းကို အလွန်မုန်းတီးသောအကြည့်ဖြင့် ကြည်နေသည်။ သို့သော်လည်း ဝမ်လင်းကိုတော့ ကြောက်လန့်နေဟန် ရှိသည်။

“မင်း ဘယ်သူလဲ… “ ဝမ်လင်းက မေးလိုက်သည်။ သူက ထူးဆန်းသောလူကို မတိုက်ခိုက်ချင်ပေ။ ထိုလူထံ၌ အဆောင်စာရွက်က ၉ခုတောင် ရှိနေသည်။ တစ်ရွက်ကို တစ်သက်နှင့် တွက်လျှင် အသက်၉သက် ရှိသည်နှင့်တူနေသည်။ တိုက်မယ်ဆိုလျှင်တောင်မှ နိုင်ဖို့အတွက် ဝမ်လင်း အတော်ကြိုးစားအားထုတ်ရမည် ဖြစ်သည်။

နှောင်ဖွဲ့ခြင်းကင်း တန်ခိုးရှင်

ဘာသာပြန် ... Oo Zaw

အပိုင်း (၈၉) ပုံရိပ်ယောင်မှော်ရတနာ

ဝမ်လင်းက အေးစက်စွာ ပြောလိုက်သည်… “ငါက ဒီမှာ လေ့ကျင့်နေတာ… ဒါ့ကြောင့် မလိုအပ်ပဲ ပြဿနာတွေ မဖန်တီးချင်းဘူး… မင်းလည်း ပြန်သွားလိုက်ပါ… ငါ့ကို နောက်တစ်ခါ လာမနှောင့်ယှက်ပါနဲ့… ဒီကိစ္စကို ဒီမှာပဲ မေ့လိုက်ရအောင်… “

ထူးဆန်းသောလူက ပဟေဠိဖြစ်နေသောအမူအရာဖြင့် ဝမ်လင်းနားမလည်သောစကားများကို ပြောလိုက်သည်။ သူတို့၏နှစ်ယောက်ဖြစ်နေပုံက ဝမ်လင်းကလည်း သူ့စကားနားမလည်သကဲ့သို့ သူကလည်း ဝမ်လင်း၏စကားကို နားမလည်ပေ။

ဝမ်လင်းက အနည်းငယ်စဉ်းစားပြီး ကျိုးပဲ့နေသောနံရံတစ်ခုဆီသို့ ဖြည်းဖြည်းချင်း တိုးကပ်သွားလိုက်၏။ ဝမ်လင်း လှုပ်ရှားလာသည်ကို မြင်ပြီး ထူးဆန်းသောလူက သတိထားသည့်အနေအထား ဖြစ်သွားသည်။

ဝမ်လင်းက ညာလက်ကို ဝေ့ရမ်းပြီး နံနံပေါ်တွင် တစ်စုံတစ်ခုကို ရေးဆွဲလိုက်သည်။ ထူးဆန်းသောလူက ဝမ်လင်း၏လက်ချောင်းလေးများကို စိုက်ကြည့်နေပြီး သူ့မျက်နှာက နားလည်သည့်အမူအရာနှင့် ဖြစ်၏။

ဝမ်လင်းက အလျင်အမြန် ယခုရောက်နေသည့် နေရာကို ပုံကြမ်းဆွဲလိုက်ပြီး ပျက်စီးနေသည့်နေရာတစ်ခုလုံး၏ အလယ်တွင် စည်းတားလိုက်သည်။

ထို့နောက် ဝမ်လင်းက ထူးဆန်းသောလူကို လက်ညှိုးထိုးပြပြီး ပုံ၏ညာဘက်ခြမ်းကိုလည်း ထိုးပြလိုက်သည်။ ထို့နောက် သူ့ကိုယ်သူ လက်ညှိုးထိုးပြီး ဘယ်ဘက်ခြမ်းကိုလည်း ထိုးပြလိုက်သည်။ ထို့နောက် တားထားသည့်စည်းကို ညွှန်ပြပြီး တင်းမာခက်ထန်စွာ ပြောလိုက်သည်။

“မင်း ငါ့ဘက်ကို ကျော်လာရင်… ငါ့ရဲ့စိတ်စွမ်းအင်ကို အကုန်သုံးပြီး မင်းကို ရအောင် သတ်မယ်… “

ထူးဆန်းသောလူက အံ့အားသင့်နေပြီး သူ့ရင်ဘတ်ကို ပွတ်ကြည့်လိုက်သည်။ သူ့မျက်လုံးထဲတွင်လည်း ကြောက်လန့်သောအရိပ်အယောင်များ ပေါ်လာ၏။ ထို့နောက် သူက ဓားကို ကြည့်လိုက်ပြီး ထူးဆန်းသောအသံဖြင့် ပြောလိုက်သည်။

ဝမ်လင်း မျက်မှောင်ကျုံ့သွား၏။ ထူးဆန်းသောလူက သူပြောသည့်စကားကို ချူးယန်နားမလည်သည်ကို မြင်သွားပြီး ဗျာများနေသည့် အမူအရာဖြင့် လက်ကို ခါရမ်းပြလိုက်သည်။ သူက ရုတ်တရက် သူ့ခေါင်းကို ရိုက်လိုက်ပြီး ဘေးနားရှိနံရံတစ်ခုကို လက်သီးနှင့် ထိုးလိုက်သည်။ ထိုအခိုက်အတန့်တွင် သူ့ကိုယ်မှ သင်္ကေတများက လင်းလက်လာပြီး နံရံက ပြိုကျသွား၏။

သူက နံရံမှ ပြိုကျသွားသော ကျောက်တုံးကျောက်ခဲများကို ကောက်ယူလိုက်ပြီး အနည်းငယ် စဉ်းစားလိုက်သည်။ ထို့နောက် သူက ကျောက်တုံးများကို မြေပြင်ပေါ်တွင် ချကာ ဝမ်လင်းကို ကြည့်ပြီး ထူးဆန်းသောစကားများ ပြောလိုက်ပြန်သည်။

ဝမ်လင်း၏မျက်နှာက အနည်းငယ် စိတ်သက်သာရာ ရသွားသည်။ သူက လေထဲတွင် လှမ်းဆွဲလိုက်သည့်ပုံစံလုပ်လိုက်ရာ ချက်ချင်း ထူးဆန်းသောလူနားမှ ကျောက်တုံးအားလုံးက ဘေးတွင် အစီအစဉ်တကျ စီထားသကဲ့သို့ ဖြစ်သွား၏။ ထို့နောက် ညာဘက်လက်ဖြင့် အစီအရင်တစ်ခုကို ဖန်ဆီပြီး အလင်းရောင်တစ်ခုကို ပစ်လွှတ်လိုက်သည်။ မကြာမီ ကျောက်တုံးများတဝှိုက်တွင် မြူများက ပြန်လည်ဖွဲ့စည်းလာ၏။

ဝမ်လင်းက ထူးဆန်းသောလူကို စိုက်ကြည့်ပြီး တည်ငြိမ်စွာ မေးလိုက်သည်… “မင်းပြောချင်တာ ဒီစိတ်ထွေပြားဝင်္ကပါအစီအရင်လား… “

ထူးဆန်းသောလူ၏မျက်နှာတွင် စိတ်လှုပ်ရှားသည့်အမူအရာများ ပေါ်လာပြီး လက်ကို ဝေ့ရမ်းလိုက်ကာ သူ့ရင်ဘတ်ကို ပြန်ရိုက်လိုက်သည်။ ရုတ်တရက် သူ့ကိုယ်က တောက်ပလာ၏။ မြေပြင်ကလည်း တုန်ခါလာပြီး ဝင်္ကပါအစီအရင်ချထားသော ကျောက်တုန်းများရှိရာမြေပြင်သည် လေထဲသို့ မြောက်တက်လာ၏။ မြေပြင်တွင်လည်း ကျောက်တုံးများ ရှိရာနေရာတွင် မြေပြင်ပေါ်တွင် ကြီးမားသောအပေါက်ကြီး ဖြစ်ကျန်ခဲ့သည်။

စိတ်ထွေပြားဝင်္ကပါအစီအရင်အသေးက တောင်အသေးတစ်လုံးကဲ့သို့ ထူးဆန်းသောလူ၏ဦးခေါင်းထက်တွင် လွင့်မျောနေသည်။ သူက ဝမ်လင်းကို ခေါင်းညိတ်ပြပြီး အလျင်အမြန် ထွက်သွား၏။ တော်တော်ဝေးဝေးသို့ ရောက်သောအခါ သူက ရပ်လိုက်ပြီး ဝမ်လင်းကို လှည့်ကြည့်ကာ စကားတစ်ချို့ အော်ပြောလိုက်သည်။ ထို့အပြင် အမူအရာတစ်ချို့ ကိုပါ လုပ်ပြပြီး အဝေးသို့ ပျောက်ကွယ်သွား၏။

ဝမ်လင်းက ပျောက်ကွယ်သွားသော ထူးဆန်းသောလူကို စိုက်ကြည့်နေမိသည်။ ထူးဆန်းသောလူ၏ အဆောင်စာရွက်များက အလွန်အစွမ်းထက်လွန်းသည်။ ဖြစ်နိုင်လျှင် ထူးဆန်းသေလူနှင့် သေသေကြေကြေ မတိုက်ခိုက်ချင်ပေ။

ထိုအကြောင်းကို တွေးနေစဉ်မှာပင် သူ၏အမူအရာက ပြောင်းလဲသွား၏။ သူ့ဘေးမှ ဓားကိုလည်း အသင့်ပြင်ထားလိုက်သည်။ သူ၏မျက်လုံးများကလည်း သတ်ဖြတ်ချင်စိတ် အပြည့်နှင့် ဖြစ်သည်။ ထူးဆန်းသောလူက ပြန်လာနေသည်။

ဝမ်လင်းက ထူးဆန်းသောလူကို ကြည့်ပြီး ခက်ထန်စွာ ပြောလိုက်သည်… “မင်းက သေချင်နေပြီလား… “

ထူးဆန်းသောလူက ရပ်တန့်လိုက်၏။ သူ့လက်ထဲတွင် လုံးဝန်းသောအရာတစ်ခုကို ကိုင်ထား၏။ သူက လက်ကို ရမ်းပြပြီး ရှင်းပြရန် ကြိုးစားလိုက်သည်။ ဝမ်လင်း၏ သတ်ဖြတ်ချင်စိတ်များဖြင့် ပြည့်နေသောမျက်လုံးကို မြင်ပြီး သူက လုံးဝန်းသောအရာဝတ္ထုကို ဝမ်လင်းဆီသို့ ပစ်ပေးလိုက်သည်။

ဝမ်လင်းက နောက်သို့ အနည်းငယ် ဆုတ်လိုက်၏။ ထူးဆန်သောလူက အားအနည်းငယ်ပင် ထည့်ပြီး မပစ်လိုက်သည်အတွက် မြေပြင်ပေါ်သို့ကျပြီး အနည်းငယ်လိမ့်သွားကာ ဝမ်လင်း၏ရှေ့တွင် ရပ်တန့်သွားသည်။

ထို့နောက် ထူးဆန်းသောလူက ဝမ်လင်းကို ပြုံးပြပြီး ထွက်သွား၏။

ဝမ်လင်းက ပျောက်ကွယ်သွားသော ထူးဆန်းသောလူကို ကြည့်လိုက်ပြီး လုံးဝန်းသောအရာလေးကို အောက်သို့ ငုံ့ကြည့်လိုက်သည်။

အချိန်သည် နေရောင်ပင် ထွက်လာနေပြီ ဖြစ်သည်။ လုံးဝန်းသောအရာဝတ္ထုလေးသည် လက်သီးဆုပ်၏ ၁၀ပုံ၁ပုံခန့်သာရှိသော ကျောက်တုံးလေးဖြစ်သည်။ ကျောက်တုံးပေါ်တွင် ဖုန်မှုန်များကပ်နေပြီး အက်ကွဲရာတစ်ချို့လည်း ရှိ၏။ ကျောက်တုံးကို ကြည့်ပြီး ဝမ်လင်းက အနည်းငယ် အံ့အားသင့်သွား၏။ သူက မြေပြင်ပေါ်မှ ကျောက်တုံးကို ကောက်ယူပြီး နေရောင်နှင့် သေချာလှည့်ပတ်ပြီး ကြည့်လိုက်သည်။

ကျောက်တုံးမှ သေးငယ်သောစိတ်စွမ်းအင်ငွေရောင်လေးက ယိုစိမ့်ပြီး ထွက်နေသည်။

“ဒါက ရတနာတစ်ခုလား… “ သူက မှင်သက်သွားပြီး နတ်ဘုရားစိတ်အာရုံဖြင့် စစ်ဆေးကြည့်ပြီး စိတ်စွမ်းအင်အနည်းငယ်ကို ကျောက်တုံးထဲ ပို့လွှတ်ကြည့်လိုက်၏။

ရုတ်တရက် ကျောက်တုံးမှ အဖြူရောင်မီးခိုးများ ထွက်လာပြီး အဘိုးကြီးတစ်ယောက်၏ပုံစံ ပေါ်လာသည်။ ထိုလူကြီးထံမှ အန္တရာယ်ရှိသောအော်ရာကို ဝမ်လင်း ခံစားမိသည်။ အဘိုးကြီးက ဝမ်လင်းကို စိုက်ကြည့်ပြီး သရော်ပြုံးဖြင့် ပြုံးလိုက်သည်… “မင်းက ဒီအဘိုးကြီးကို တိုက်ခိုက်ရဲတယ်ပေါ့… “

ဝမ်လင်းလည်း အံ့ဩသွားပြီး နောက်သို့ ခြေလှမ်းအနည်းငယ် ဆုတ်လိုက်၏။ အဘိုးကြီးကို သေသေချာချာ ကြည့်လိုက်ပြီးနောက် အဘိုးကြီးသည် ချီစုစည်းခြင်းအဆင့် အလွှာ၁၅ကိုသာ ရောက်သေးကြောင်း သိလိုက်ရသည်။ သူက နှာခေါင်းကို ပွတ်လိုက်ပြီး ကျောက်တုံးထဲသို့ စိတ်စွမ်းအင်များ ပိုမိုထည့်လိုက်၏။

စိတ်စွမ်းအင်များ ကျောက်တုံးထဲကို ထည့်လိုက်သည်နှင့် အဘိုးကြီး၏စိတ်စွမ်းအင်များကလည်း မြင့်တက်သွားပြီး ခန္ဓာကိုယ်သန့်စင်ခြင်းအလယ်အဆင့်သို့ ရောက်သွား၏။ အဘိုးကြီးက လေထဲတွင် မျောနေရင်း ပြောလိုက်သည်… “မင်းက ဒီအဘိုးကို တိုက်ရဲတာလား… “

ဝမ်လင်း အလွန်ကို အံ့အားသင့်သွားသည်။ ကျောက်တုံးကို ဘယ်လိုအသုံးပြုရမလဲ သူမသိချေ။ ထို့ကြောင့် စိတ်စွမ်းအင်များ ကျောက်တုံးထဲသို့ ပိုမိုထည့်ကြည့်ရန် ဆုံးဖြတ်လိုက်သည်။

အဘိုးကြီး၏မျက်လုံးများက တောက်ပလာပြီး သူ၏အော်ရာကလည်း လျင်မြန်စွာ မြင့်တက်လာသည်။ ထို့နောက်တွင်မူ အဘိုးကြီး မည်သည့်အဆင့်သို့ ရောက်သွားသဲ ဝမ်လင်းတောင်မှ မသိနိုင်တော့ပေ။ သို့သော်လည်း အဘိုးကြီး၏အကြည့်တစ်ချက်နှင့်တင် ဝမ်လင်း ကြောက်လန့်စိတ်များ ဖြစ်ပေါ်လာသည်။ အဘိုးကြီးက အသက်ရှူထုတ်လိုက်ပြီး ပြိုင်ဘက်ကင်းအော်ရာကို ထုတ်လွှတ်လိုက်သည်။ ထို့နောက် အဘိုးကြီးက လက်ကို နောက်ပစ်ပြီး ပြောလိုက်သည်… “အမြုတေဖွဲ့တည်ခြင်းအဆင့်အောက်က လူတွေက ငါ့ကို ထိခိုက်အောင် မတိုက်နိုင်ဘူး… မမြင်ချင်ဘူး… ထွက်သွားစမ်း… “

ဝမ်လင်းက စိတ်စွမ်းအင်များ ပို့လွှတ်မှုကို ရပ်ဆိုင်းလိုက်ပြီးနောက် အဘိုးကြီးကလည်း လျင်မြန်စွာ ပျောက်ကွယ်သွားပြီး အငွေ့များက ကျောက်တုံးထဲသို့ ပြန်လည်ဝင်ရောက်သွား၏။ မီးခိုးငွေ့များ ပြန်လည်ပျောက်ကွယ်သွားသည်နှင့် ကျောက်တုံးပေါ်တွင် အက်ရာတစ်ခု ထပ်ပေါ်လာသည်။

ဝမ်လင်းက ကျောက်တုံးကို စိုက်ကြည့်ပြီး အံ့အားသင့်နေသည်။ ဝမ်လင်းက ကျောက်တုံးက မည်သည့်ရတနာပစ္စည်းဖြစ်သည်ကို မှန်းဆနိုင်သွားပြီ ဖြစ်သည်။ ကျောက်တုံးက ပုံရိပ်ယောင်မှော်ရတနာတစ်ခုဖြစ်ပြီး ပုံရိပ်ယောင်သည် အစစ်နီးပါး တူညီနေသည်။ အဘိုးကြီးပြောသည့်စကားများကို ထည့်မတွက်လျှင်တောင် အဘိုးကြီးထံမှ ထွက်လာသသောအော်ရာများနှင့်တင် ပြည့်စုံတဲ့ပုံရိပ်ယောင်တစ်ခု ဖြစ်နေလေပြီ။ ထို့အပြင် နောက်ဆုံးပြောလိုက်သော စကားလုံးများသည် လွန်စွာ ပီပြင်လှသည်။

ဝမ်လင်းသာ ကျောက်တုံးကို မရရှိခဲ့ပါက အဘိုးကြီး၏အော်ရာနှင့်ဟန်ပန်ကို ကြည့်ပြီး အတုဟု ပြောနိုင်မည်မဟုတ်ပေ။ အဘိုးကြီး၏အော်ရာသည် တစ်ကယ့်ကို ဘိုးဘေးကျင့်ကြံသူတစ်ယောက်၏ပုံစံအတိုင်းပင် ဖြစ်သည်။

သူ၏ကျင့်စဉ် မြင့်လာသည်နှင့် ကျောက်တုံးထဲသို့ စိတ်စွမ်းအင်များ ပိုမို ထည့်သွင်းလာနိုင်မည်ဖြစ်ပြီး အဘိုးကြီး၏စွမ်းအားကလည်း မြင့်တက်လာမည် ဖြစ်သည်။ သည်ကျောက်တုံးက တခြားလူများကို ခြောက်လှန့်ရန်အတွက် အကောင်းဆုံးရတနာပစ္စည်းတစ်ခု ဖြစ်သည်။

ဝမ်လင်းက ရတနာကို သိမ်းပြီး ရေရွတ်လိုက်သည်… “ဒီထူးဆန်းတဲ့လူက တစ်ကယ်ကို စိတ်ဝင်စားဖို့ ကောင်းတာပဲ… သူက ငါ့ရဲ့ စိတ်ထွေပြားဝင်္ကပါကို ဖျက်ဆီးမိပြီး မကောင်းတတ်လို့ ဒီရတနာကို ပြန်ပေးခဲ့တာ ဖြစ်ရမယ်… “

ဒီလဲလှယ်မှုအရ ဝမ်လင်းက ထိုထူးဆန်းသောလူသည် မှော်ရတနာများကို အသုံးပြုနိုင်စွမ်း မရှိသည်ကို နားလည်လိုက်၏။ ထို့အပြင် ပျက်စီးနေသောမြို့ထဲတွင် ရတနာများ ရှိနေနိုင်သေးသည်ဟု ကောက်ချက် ချလိုက်သည်။

ယခု အချိန်တွင် ပျက်စီးနေသည့်မြို့ကြီးက ဝမ်လင်း၏မျက်လုံးထဲတွင် ပိုင်ရှင်မရှိသောရတနာတစ်ခုအဖြစ် မြင်လာသည်။

“ဒီနေရာမှာ ထူးဆန်းတဲ့အလင်းတိုင်၊ ပုံရိပ်ယောင်မှော်ရတနာနဲ့ ထူးဆန်းတဲ့အပြာရောင်လူ… နောက်ထပ်ရော ဒီနေရာမှာ ဘာလျှို့ဝှက်ချက်တွေ ရှိနေဦးမလဲ… “ ဝမ်လင်းက မေးစေ့ကို ပွတ်ပြီး စဉ်းစားလိုက်သည်။ ယခုက နေ့အချိန်ဖြစ်နေသောကြောင့် ဝမ်လင်းက ဝင်္ကပါကို ပြန်ချလိုက်ပြီး အလယ်တွင် ထိုင်ကာ ယင်စိတ်ဝိညာဉ်ရေကို သောက်ပြီးနောက် စတင်ကျင့်ကြံတော့၏။

သည်လိုနှင့် ၂လကုန်ဆုံးသွား၏။

တစ်ရက်တွင် ဝမ်လင်းက အခန်းထဲတွင် ထိုင်ပြီး ကျင့်ကြံနေသည်။ လွန်ခဲ့သည့် ၂လလုံးလုံး ယင်စွမ်းအင်များကို စုပ်ယူပြီး လေ့ကျင့်နေသည့်အတွက် ပထမချိုးဖြတ်မှုကို စတင်ရန်အတွက် ယင်စွမ်းအင်များကို လုံလုံလောက်လောက် စုဆောင်ထားပြီး ဖြစ်၏။

တစ္ဆေလောကပျံတက်ခြင်းကျင့်စဉ်တစ်ခုလုံးကို ဝမ်လင်း လေ့လာပြီး ဖြစ်၏။ ချိုးဖြတ်မှုကြီး၃ခုက ဘယ်လိုလဲဆိုတာကို ကောင်းကောင်းနားလည်နေပြီ ဖြစ်သည်။

ချိုးဖြတ်မှုအတွက် အဓိကအချက်၃ချက်မှာ ဝမ်းဗိုက်ရှိ တန်းထျန်း၊ ရင်ဘတ်ရှိ ချီပင်လယ်နှင့် ဘိုးဘေးချီသွေးကြောတို့ ဖြစ်ကြ၏။

ထိုနေရာ၃ခုလုံးသည် အေးခဲအမြုတေ ဖြစ်လာရန် တစ်နေရာကို ၃ကြိမ်စီ ချိုးဖြတ်ရမည် ဖြစ်သည်။ အဆင့်၁အတွက် တန်းထျန်းကို ဖွင့်ရမည်ဖြစ်ပြီး အဆင့်၂ကို ရောက်သည့်အခါ တန်းထျန်း၌ ပွင့်နေသည်ကို ဖျက်ဆီးပစ်ပြီး ပြန်ဖွင့်ရမည်ဖြစ်သည်။

တစ္ဆေလောကပျံတက်ခြင်းကျင့်စဉ်၏ စည်းမျဉ်းက အရင်ဖျက်ဆီးပြီးမှ ပြန်တည်ဆောက်ကာ အစွမ်းပိုထက်စေခြင်း ဖြစ်သည်။

ဝမ်လင်းက အနည်းငယ်စဉ်းစားလိုက်ပြီး ပထမချိုးဖြတ်မှုအတွက် တန်းထျန်းထဲရှိ ယင်စွမ်းအင်များကို ကျင့်စဉ်ထဲကအတိုင်း ရွေ့လျားစေလိုက်သည်။

သူ၏ထိန်းချုပ်မှုအောက်တွင် ယင်စွမ်းအင်များ ပိုပြီး မြန်မြန် လည်ပတ်လာသကဲ့သို့ သူ၏ဝမ်းဗိုက်မှလည်း နာကျင်မှုကို ခံစားလာရသည်။ နာကျင်မှုက ပိုပြင်းထန်လာလေ ချိုးဖြတ်ရန် နီးကပ်လာလေဖြစ်ကြောင်း ဝမ်လင်း သိထားသည်။

ထိုနာကျင်မှုမျိုးက သာမန်လူများ တောင့်ခံနိုင်သည့်နာကျင်မှုမျိုး မဟုတ်ပေ။ ဗိုက်ကို ဓားနှင့်ထိုးပြီး အထဲကို မွှေလိုက်သကဲ့သို့ နာကျင်မှုကို ခံစားရခြင်း ဖြစ်သည်။ အသက်အနည်းငယ်ရှုချိန်ခန့်ကြာပြီးနောက်တွင် ဝမ်လင်း၏တစ်ကိုယ်လုံး ချွေများဖြင့် စိုရွှဲနေပြီ ဖြစ်သည်။

ယင်စွမ်းအင်များက လျင်မြန်စွာ လည်ပတ်ရင်း ဝဲကတော့ပုံစံတစ်ခုအဖြစ်သို့ ပြောင်းသွားပြီး ပိုပိုပြီး ကြီးမားလာသည်။ အပြင်ဘက်မှသာ ဝမ်လင်းကို ကြည့်လိုက်လျှင် သူ၏ဝမ်းဗိုက်က အစိမ်းရောင်ပြောင်းနေပြီး တစ်ကိုယ်လုံးတွင်လည်း ပါးလွှာသောနှင်းခဲလေးများ ကပ်နေသည်ကို တွေ့နိုင်ပေလိမ့်မည်။

နာကျင်မှုက ပိုပိုပြီး ဆိုးလာသဖြင့် ဝမ်လင်းက အံတင်းတင်းကြိတ်ပြီး တောင့်ခံထားရ၏။ ရုတ်တရက် ယင်စွမ်းအင်များက သူ၏တစ်ကိုယ်လုံးကို ဖြတ်သွား၏။

ထိုအချိန်တွင် ယင်စွမ်းအင်များ လှည့်ပတ်မှုနှင့်အတူ လေပွေကဲ့သို့ စုပ်ဝဲတွင်းနက်ကြီးတစ်ခု ဖြစ်ပေါ်နေသည်။ ထိုစုပ်ဝဲကြီးအတွင်းသို့ ယင်စွမ်းအင်များက ရေထဲကို ခဲလုံးကျသကဲ့သို့ တစ်ဟုန်ထိုး စီးဝင်နေ၏။

မကြာမီ သူ၏ခန္ဓာကိုယ်ထဲမှ စိတ်စွမ်းအင်များကိုလည်း စုပ်ဝဲကြီးက စတင်စုပ်ယူလာ၏။

စုပ်ဝဲကြီးအတွင်းတွင်လည်း ပြောင်းလဲမှုများ ဖြစ်နေသည်။ တစ်ဖက်နှင့်တစ်ဖက် အမြဲလျစ်လျူရှုနေတတ်သည့်စွမ်းအင်၂မျိုးက ယခုအချိန်တွင် ထိန်းချုပ်နိုင်ရန်အတွက် တစ်ခုနှင့်တစ်ခု တိုက်ခိုက်နေကြ၏။

တဖြည်းဖြည်းနှင့် စိတ်စွမ်းအင်များက စတင်ဝါးမြိုခံရပြီး ယင်စွမ်းအင်များနှင့် ပေါင်းစပ်သွားကာ စုပ်ဝဲကြီးထဲတွင် နှေးကွေးစွာ လည်ပတ်နေသော စွမ်းအင်သစ်တစ်မျိုး ဖြစ်ပေါ်လာသည်။

နှောင်ဖွဲ့ခြင်းကင်း တန်ခိုးရှင်

ဘာသာပြန် ... Oo Zaw

အပိုင်း (၉၀) ချိုးဖြတ်နိုင်ခြင်း

တစ္ဆေလောပျံတက်ခြင်းကျင့်စဉ်၏ပထမအလွှာကို အောင်မြင်သွား၏။