အရာအားလုံးကို ဆုံးရှုံးလိုက်ရပြီဖြစ်သည်။ ကမ္ဘာကြီးရှိ သဟဇာတဖြစ်မှုများကို ကိုယ်တိုင် ဖျက်ဆီးလိုက်သောကြောင့် ဓါတ်ကြီးလေးပါးကလည်း ကျွန်တော်တို့ကို လျစ်လျှူရှုလိုက်လေပြီ။ Oshu'gan တောင်ထိပ်ကိုလည်း မကောင်းဆိုးရွားများက စောင့်ကြပ်နေ၏။ အတော်များများ မက်မောစွာသောက်သုံးခဲ့သည့် သွေးများကြောင့် ခန္ဓါကိုယ်များမှာလည်း ပျက်စီးစပြုပြီ။ ထိုအရာအားလုံးကို GuYdan ၏ ဦးဆောင်မှုအောက်တွင် ကျွန်တော်တို့ ကိုယ်တိုင်လုပ်ခဲ့ခြင်းပင်ဖြစ်သည်။ Kil'jaden ကလည်း ထွက်သွားခဲ့ပြီ။ အရာအားလုံး သေဆုံးတော့မည့် အချိန်သို့ ရောက်လာလေပြီ။
"ငါ ဘာလုပ်ရမလဲ" ထိုစကားလုံးများ သူ့ပါးစပ်မှထွက်လာသည်ကို Gul'dan အံ့သြနေမိသည်။
"ဒါမင်းကိုယ်တိုင်ရွေးခဲ့တာပဲလေ" Ner'zhul က ဝင်ထောက်သည်။
"ခင်ဗျားအပြစ်မပါတာကျနေတာပဲ"
"ဟုတ်တာပေါ့ ငါလည်းမှားခဲ့တယ်။ ဒါပေမယ့် ငါက ကိုယ့်လူမျိုးတစ်ခုလုံးကို မလဲခဲ့ဘူးလေ။ မင်းရမယ်ဆိုတဲ့ အစွမ်းတွေ ဘယ်မှာလဲ Gul'dan? "
Gul'dan တုန်လှုပ်ကာ ထွက်သွားသည်။ Ner'zhul ပြောတာတွေ မှန်နေ၍ အရှိုက်ထိသွားခြင်းပင်။
ဆုလာဘ်တွေရဖို့နေနေသာသာ Kil'jaden က ဒီတိုင်းကြီး ပျောက်သွားခဲ့သည်။ မကောင်းဆိုးရွားများ Warlock များ ရူးသွပ်နေသော Horde တို့နှင့် သုံးစားမရတော့သော မြေကိုသာ ချန်ထားခဲ့၏။
"မဟုတ်ဘူး။ ဒါအကုန်မဟုတ်သေးဘူး"
Shadow Council နှင့် ရုပ်သေးရုပ် Blackhand ကျန်ပါသေးသည်။
သူတို့ကို Black Temple သို့ ဆင့်ခေါ်ရမည်။
"ဟုတ်တယ်။ Shadow Council ကျန်သေးတယ်"
"မြေက သုံးစားမရတော့ဘူး"
Durotan က သူ့သူငယ်ချင်းဘေးတွင်ရပ်ကာ မြေကြီးကို ကန်လိုက်ရင်းပြောသည်။ အဝါရောင်မြက်များအောက်တွင် ဖွာနေသောဖုန်နှင့် ခဲလုံးများသာ ကျန်တော့၏။
Orgrim က ဘာမှမပြောသော်လည်း သူ့မျက်လုံးများက ထောက်ခံနေ၏။ Durotan နှင့် သူတို့ ငယ်ငယ်တုန်းက ရေကူးပြိုင်ခဲ့သည် မြစ်မှာ ရေစီးဆင်းခဲ့သည့် အစအန မရှိတော့။ တိရစ္ဆာန်အလောင်းများနှင့် အနည်အနှစ်များသာ ကျန်တော့သည်။ ထိုရေကို သောက်လျှင် ဖျားနာမည်၊ မသောက်လျှင်လည်း ရေငတ်သေရုံသာရှိမည်။
ရေမရှိလျှင် အပင်မရှိ။ ဘယ်နည်းနှင့် ဆက်ရှင်နေမှန်းမသိသော Terokkar တောအုပ်လို တောအုပ်များကတော့ ဟိုတစ်စု၊ ဒီတစ်စုရှိနေသည်။ အပင်မရှိလျှင် သားကောင်မရှိသောကြောင့် ore များမှာ ပိန်လှီလာကြသည်။ လွန်ခဲ့သော ၃နှစ်အတွင်း ငတ်ပြတ်၍သေသည်မှာ စစ်ပွဲအတွင်းသေသည်ထက် ပိုများခဲ့၏။
"သုံးစားမရတာထက်တောင် ဆိုးပါတယ်...။ Frostwolf အဖွဲ့ရော ဘယ်ကစားစရာရနေလဲ"
သူရော Durotan ပါ အစိမ်းရောင်ဖြစ်နေသော်လည်း သွေးကိုတိုက်ရိုက်သောက်ခဲ့သူများထက်တော့ ညိုပါသေးသည်။ စိမ်းရမည့် မြေပြင်က ညိုသွားပြီး ညိုရမည်ြအသားများက စိမ်းလာခြင်းမှာ တစ်မျိုးရယ်စရာဖြစ်နေ၏။
"တိုက်ပွဲမှာ လက်နက်တွေအခိုးခံလိုက်ရတယ်"
"ဘယ်အဖွဲ့လဲ?"
"Shattered Hand"
Orgrim ခေါင်းညိတ်လိုက်သည်။ Draenei တွေကို သတ်ဖို့မပြောနှင့် တစ်ကောင်တစ်မှီးမှ မတွေ့ရတော့သည်မှာ ခြောက်လခန့်ရှိပြီဖြစ်သော်လည်း Durotan တို့အဖွဲ့က သွေးသောက်ရန် ငြင်းဆန်ခဲ့မှုကြောင့် အငြိုးထားခံနေရဆဲဖြစ်သည်။
"နောက်တစ်ခါလာရင် စားစရာတွေ ယူခဲ့မယ်"
"မင်းလှူတာကို ငါမယူနိုင်ဘူး"
"မင်းနေရာမှာ ငါသာဆို ငါ့ကိုအသေရိုက်ပြီး စားစရာတွေ အတင်း ထိုးထည့်မှာမလား"
Durotan ရော Orgrim ပါ ရယ်လိုက်မိသည်။ ဖြစ်ပျက်နေသည့် ကိစ္စအားလုံးကို ခဏမျှမေ့သွားသလိုပင်။
"ကလေးတွေအတွက် တွေးပြီး လက်ခံလိုက်ပါမယ်"
Durotan က ပြောပြီး ပျက်စီးနေသော မြေကို ပြန်ကြည့်လိုက်သည်။ ဆိုးရွားသော မှောင်မိုက်သော နာမည်အသစ်များ ထွက်ပေါ်လာသည်။ ခံတပ်ကို Hellfire ခံတပ်ဟုခေါ်ကာ နေရာတစ်ခုလုံးကိုတော့ Hellfire ကျွန်းဆွယ်ဟုခေါ်နေကြသည်။
"တစ်ခုခုမလုပ်ရင် Draenei မျိုးသုဥ်းတာကနေ Ore တွေပါ မျိုးသုဥ်းတော့မယ်။ မြေကြီးကနေ စားစရာမရတော့လို့ အစာလုဖို့ တစ်ယောက်နဲ့တစ်ယောက် တိုက်လိုက်နေရတယ်။ Warlock တွေကလည်း ဖျက်ဆီးဖို့ တိုက်ခိုက်ဖို့ပဲရတယ်။ ကယ်တင်ဖို့ကျတော့ မလုပ်တတ်ဘူး"
Orgrim က ခပ်တိုးတိုးမေးသည်။
"ဓါတ်ကြီးလေးပါးနဲ့ ဆက်သွယ်ဖို့ လုပ်ကြည့်ကြသေးလား"
"လုပ်လို့မရဘူး။ Oshu'gan တောင်ကိုလည်း မကောင်းဆိုးရွားတွေက စောင့်နေတော့.. မျှော်လင့်ချက်မရှိဘူး"
"ဒါဆိုရင်.. သွားပြီပေါ့"
Orgrim သူ့တူကို ငုံ့ကြည့်လိုက်သည်။ Doomhammer ဟောကိန်းက တကယ်ဖြစ်လာတော့မှာလား။
ဒါပေမယ့်... အရာအားလုံး သေမလိုဖြစ်နေတာကို.. ဘယ်လိုလုပ် အဆင်ပြန်ပြေအောင်လုပ်နိုင်မှာလဲ?
အသက်ရှင်ချင်စိတ်က စွမ်းအားကြီးတယ်... Gul'dan အိပ်ဖို့ပြင်နေရင်း တွေးမိသည်။ Black Temple ထဲမှ သေချာပြင်ဆင်ထားသည့် အခန်းတစ်ခန်းထဲတွင် သူနေသည်။ ထိုအခန်းထဲတွင် မကောင်းဆိုးရွားများကို ဆင့်ခေါ်ရာတွင် လိုအပ်သည့် ကိရိယာတန်ဆာပလာများ၊ အရိုးခေါင်းများအစုံရှိပြီး အမွှေးနံ့သာများကို မီးမြိုက်ထား၍ မွှေးကြိုင်နေသည်။ Velen တစ်ယောက် Black Temple တွင် နေခဲ့တုန်းက အိပ်သည့် အိပ်ရာနှင့် တူမည် ဟု သူတွေးမိသည်။ ထို့နောက် လျင်မြန်စွာ အိပ်ပျော်သွားတော့သည်။
Kil'jaden ထွက်သွားကတည်းက မမက်ဖြစ်တော့သော အိပ်မက်ကို မက်နေသည်။ ခံစားချက်က မှောင်မိုက်ကာ ထူးဆန်းနေသော်လည်း အမှန်ဖြစ်ကြောင်း သူသိနေ၏။ ပိန်ပါးလှသော ore အထီးတစ်ယောက်ကို မြင်နေရသည်။ ထိုလူစိမ်းထံမှ ရသော အစွမ်းမှာ ကြီးမားလှ၍ တုန်လှုပ်သွားမိသည်။ လူစိမ်း၏ အသံမှာ ယောက်ျားပီသလှပြီး နားထောင်ကောင်းလှသည်။
"မင်းကို တစ်ယောက်တည်းထားခဲ့တယ်လို့ မင်းခံစားနေရတယ်"
Gul'dan စိတ်အားထက်သန်စွာ ခေါင်းညိတ်လိုက်သည်။
"မင်းမြင်တောင်မမြင်ဖူးတဲ့ အာဏာတွေ အစွမ်းတွေ ပေးမယ်လို့ Kil'jaden က ကတိပေးခဲ့တယ်..."
သူ့စကားများကို Gul'dan ကြောက်သော်လည်း ဒေါသစိတ်က ပိုသွားသည်။
"သူ ကျုပ်ကိုထားခဲ့တယ်။ ကျုပ်တို့ ကမ္ဘာကို ဖျက်စီးခိုင်းပြီးတော့ သေဖို့ပစ်ထားခဲ့တာ။ ခင်ဗျားလည်း သူ့ဆီကလာတာဆိုရင်-"
"မဟုတ်ဘူး။ မဟုတ်ဘူး..။ ငါက သူ့ထက်မြင့်တဲ့နေရာကလာတာ..။ ငါက သူ့ဆရာဆီကနေလာတာ"
Gul'dan ကြက်သီးများပင်ထသွားသည်။
"သူ့....ဆရာ?"
သူနောက်ပြန်လန်ကျသွားချိန် ခေါင်းထဲ၌ ပုံရိပ်များ တိုးဝင်လာ၏။ Kil'jaden, Velen နှင့် Archimonde တို့ Eredar များဘဝမှနေ၍ မကောင်းဆိုးဝါးများ demigod များ အဖြစ်သို့ ကူးပြောင်းသွားပုံများ... ၎င်းတို့နောက်မှာ ရှိတဲ့ အင်အားကြီးသော-
"Sargeras!"
လူစိမ်းမျက်နှာကိုမမြင်ရသော်လည်း သူပြုံးနေသည်ကို ခံစားမိ၏။
"ဟုတ်တယ်။ အရာအားလုံးကို ပိုင်စိုးတဲ့သူပဲ! ပျက်သုဥ်းခြင်းနဲ့ ဖျက်ဆီးခြင်းဆိုတာ လှပမွန်မြတ်တယ်ဆိုတာ မင်းနားလည်လာမှာပါ Gul'dan.. အရာအားလုံး ဒီလမ်းကို သွားရမှာပဲ။ မင်း ငြင်းဆန်ပြီး အဖျက်စီးခံမလား၊ ကူညီပြီးတော့ ဆုယူမလား"
ထိုပျားရည်သုတ်ထားသော စကားများကို Gul'dan လန့်စပြုပြီ။
"ကျွန်တော်က ဘာပြန်လုပ်ပေးရမှာလဲ
"မင်းတို့လူတွေ သေတော့မယ်။ ဒီကမ္ဘာမှာ သူတို့ ဖျက်ဆီးစရာရော နေထိုင်စရာပါမရှိတော့ဘူး။ စားစရာ သောက်စရာရှိပြီး သတ်ဖြတ်စရာ သားကောင်ရှိတဲ့ နေရာတစ်နေရာကိုသွားရမယ်။ ore တွေ အခုဆာလောင်နေတာ စားစရာမဟုတ်တော့ဘူး။ သူတို့ သွေးဆာနေတာကို ဖြေဖျောက်ခိုင်းလိုက်ပါ"
Gul'dan မျက်မှောင်ကြုတ်သည်။
"ခင်ဗျားပြောတဲ့ဟာတွေက ကောင်းလွန်းနေတယ်။ တာဝန်တစ်ခုနဲ့ မတူဘူး"
" နှစ်ခုလုံးပဲ...။ ဒါပေမယ့် အဲ့ဒါအကုန်မဟုတ်သေးဘူး။ မင်း Shadow Council ကို အုပ်ချုပ်ခဲ့တာပဲ အာဏာရဲ့ အရသာကို သိမှာပါ။ တွေးကြည့်စမ်း ..မင်းသာ နတ်ဘုရားတစ်ပါး ဖြစ်ခဲ့ရင်.."
Gul'dan တုန်လှုပ်သွားသည်။ Kil'jaden ကလည်း ထိုသို့ပြောခဲ့ဖူးသော်လည်း Sargeras က ပိုမိုဖြည့်ဆည်းပေးနိုင်ကြောင်းကို သူသိနေသည်။ သူ လက်ညိုးညွှန်ရာ ရေဖြစ်ဖို့ စိတ်ကူးဖူးသည်။ ထောင်ပေါင်းများစွာသောသူတို့က မော်ကြည့်ကာ သူ့နာမည်ကို အော်ဟစ်နေကြသည်။ တွေးကြည့်ရင်းနှင့်ပင် သူ သားရည်ယိုလာမိသည်။
"ငါတို့မှာ ဘုံရန်သူရှိတယ်။ ငါက သူတို့ကိုသေစေချင်တယ်။ မင်းရဲ့လူတွေလည်း သတ်စရာရမယ်။ ဒါ နှစ်ဦးနှစ်ဖက်အကျိုးရှိတဲ့ ပူးပေါင်းမှုပဲ"
"ဟုတ်တာပေါ့" Gul'dan သတိမထားမိလိုက်ဘဲ ထိုလူစိမ်းဆီကို တိုးသွားမိသည်။
"ဒါပေမယ့် ခင်ဗျား လိုချင်တာ ဒါပဲဆိုတာ မယုံနိုင်သေးဘူး"
လူစိမ်းက သက်ပြင်းချလိုက်သည်။
"Sargeras ပေးမှာ ဒါတင်မကသေးဘူး။ တစ်ခုပဲ.. သူ အကျဥ်းကျနေတယ်။ သူ့ခန္ဓါကိုယ်က မှောင်မိုက်တဲ့ သမုဒ္ဒရာကြီးရဲ့ အောက်ခြေက ရှေးဟောင်းအခေါင်းတစ်ခုထဲရောက်နေတယ်။ မင်းတို့ သွေးဆာနေသလိုပဲ သူလည်း လွတ်လပ်ခြင်းကို ဆာလောင်နေတယ်။ မင်းတို့ Ore တွေကို ဒီ မပျက်စီးသေးတဲ့ ကမ္ဘာကိုခေါ်လာပါ။ မင်းတို့ပုဆိန်တွေကို ဒီလတ်ဆတ်တဲ့ အသွေးအသားတွေနဲ့ ထိတွေ့ခွင့်ပေးပြီး ငါ့ဆရာကိုကယ်မယ့် ဒီလမ်းကို လိုက်ခဲ့ကြပါ ... မင်းတွေးနိုင်တာထက်ကို ပိုလိမ့်မယ် Gul'dan "
Gul'dan တွေးနေစဥ် ထိုလူစိမ်းကပျောက်သွားကာ လှပသော လွင်ပြင်တစ်ခုသို့ သူရောက်သွား၏။ သူတစ်ခါမှ မမြင်ဖူးသည့် တိရစ္ဆာန်များပြေးလွှားနေကြသည်။ Ore တို့နှင့်ဆင်ကာ လူစိမ်းကဲ့သို့ ပိန်ပါးသည့် ပန်းရောင်သန်းသော သက်ရှိများ နှင့် ကျွဲနွားများ...
ပြီးပြည့်စုံသည်။
ရုတ်တရက် သူရေအောက်သို့ရောက်သွားကာ အသက်မရှူနိုင်ဖြစ်သွားသည်။ Sargeras ပိတ်မိနေသည့်နေရာ ဖြစ်ကြောင်း သူသဘောပေါက်သွား၏။ သူ့ကို ကယ်ရမယ် ပြီးရင်....ပြီးရင်
ကောင်းမွန်သော ပူးပေါင်းမှုတစ်ခုပင်။ ဒီကမ္ဘာမှာ နေရတာနဲ့စာလျှင် အကုန်သာသည်။ လှပသော မြေဩဇာကြွယ်ဝသော မြေနှင့်... နောက်ထပ်ဆုလာဘ်များ။ သူ ထိုလူစိမ်းကို စိုက်ကြည့်လိုက်သည်။
"ဘာလုပ်ရမလဲသာပြောပါ"
ကြမ်းပြင်ပေါ်တွင် ခြေကားယားလက်ကားယားဖြင့် Gul'dan နိုးလာသည်။ သူ့ဘေးတွင်တော့ လမ်းညွှန်ချက်များရေးထားသည့် ပုရပိုက်တစ်ခု။ သူ လျင်မြန်စွာ ဖတ်ကြည့်လိုက်သည်။
မုခ်ဝ ၊ Azeroth ၊ လူသားများ။
Medivh
Gul'dan ပြုံးလိုက်မိပါသည်။
Note : အခု ဖတ်ရတဲ့ စာအုပ်လေးက ဖတ်ရတာ အဆင်ပြေတယ် ဖတ်လို့ကောင်းတယ်ဆိုရင် Rating မှာ 5 Stars လေး ပေးပေးလို့ရပါတယ်ရှင် ^^
ပြီးတော့ ဒီဘာသာပြန်သူလေးက ကော်ဖီကြိုက်တတ်လို့ Can you please buy me a cup of Coffee? ^~^
Love y'all,
Nyl